Candela devastador na Barcadera a causa mobilizacion masal

Hasta Crisis Team a wordo activa pa esaki

• DOW a haye ta usa su Dompelpompnan pa yuda domina candela
• Varios negoshi den e area a haya ordo di evacuacion 

ORANJESTAD (AAN): Tabata Diamars net prome cu 12:17 pm, cu alarmanan a cuminza drenta tanto na Centro di Alarma, y tambe Cuerpo Policial di un candela grandi cu a start y ta expande rapidamente riba tereno di e compania Daltra NV, cu ta situa riba caminda di Barcadera.

   Momento cu Bomberonan a bay pa subi nan vehiculo, di leu caba nan a mira e muraya di huma preto y diki ta subi bay halto.  Mesora nan a keda raporta cu loke ta wordo mira ta un candela grandi.

   Mientras tanto rond di e area mes, trahadornan di demas negoshinan eybanda a cuminza sali for di edificionan.  Algun a sali pa djis keda mira kico ta pasando.  Otronan a djis subi nan auto y mobiliza for di e area.  Como cu e ta un zona industrial, un candela asina por expande y crea mas problema.

   Por a nota cu trahadornan di Apex Cement (cu antes tabata ATCo Concrete Products), a dicidi busca un di e vehiculonan cu ta wordo usa pa move concrete, y a rek esaki full riba nan dak, pa asina yuda pusha awa riba e candela, pa trata di mantene e muraya di e fabrica di Apex Cement mas safe.

   Rampenbestrijding tambe: Mientras tanto, Bureau Rampenbestrijding Aruba (BRA) a tuma nota di e potencial desastre cu e candela aki por produci pa e area, y a dicidi na activa pa bay duna yudanza den coordinacion di e combate aki.

   Bomberonan a yega y a posiciona nan mes den situacion strategico pa cuminza combati e candela.  Como cu Diamars e presencia di un Ola Tropical cu e activacion di Zona di Convergencia Intertropical a cambia direccion di biento, un biento di 10 km/h suplando di zuidoost casi no tabata disipa e huma diki aki.

   Daltra NV ta un compania cu adres Parkietenbos, cu ta procesa hero bieu, materia prima pa metanan comercial y industrial, y ta exporta nan tambe.  E compania ta deal den tur sorto di material pa e metanan aki, no djis hero, sino tambe textil, rubber, carton, palo, plastico, glas.

   Nan tin un deposito habri yena cu e material aki, net panort di e edificio di Apex Cement cu ta riba un caminda di Barcadera cu ta bay pa e Waf.

   Un di e bisiñanan di dje ta tambe e tereno di Arugas NV, cu ta situa pariba di nan.  Y ora cu a bay check, e deposito cu tabata kimando, ta apenas 41 meter leu for di e tankinan cu ta warda LPG Gas.

   Esey ta un di e motibonan cu BRA Rampenbestrijding a keda observa y actua riba cualkier peligro eybanda, y coordina e proceso di con pa ataca e candela mihor, y tambe check tur aspecto di salud, incluyendo vigila calidad di aire.  E proceso despues tabata pa activa Crisis-Team di Gobierno.

   Como cu e huma a keda “zweef’ den e area y cuminza bay nort cruza e isla, tabata un momento cu resto di pueblo a haya chens di sinti con ‘sofocante’ e poblacion di Simeon Antonio, Parkietenbos, y Cas Paloma ta sinti ora cu huma di Dump supla riba nan casnan.

   E ta ademas un peligro pa salud, specificamente e pashentnan cu ta sufri di problema cu respiracion.  Pesey mes a adverti esnan cu diripiente riba Diamars atardi a cuminza tosa, haya rosea cortico, a nota cu ta dificil pa hala rosea, por fabor keda paden.  No sali pafo di cas.

   Si e sintomanan aki a bay combina cu dolor di cabez, y dolor di garganta, ta bon pa bo consulta cu un profesional medico.

   Candela a expande: Como cu na comienzo no tabatin hopi accion ta wordo tuma pa contene e candela, y cu e cura di Daltra ta yena cu materia prima, rubber, plastico, y palo, tabata di spera cue candela a expande.  Unidadnan di Bombero for di tur Post a acudi eynan.  Cuerpo Policial a duna un coordinacion fenomenal cu tur unidad, pa asina cera tur caminda cu ta bay pa e area.  Habitantenan den e barionan mas pabao, mester a usa otro ruta pa yega na nan cas.

   Diferente Departamento di Gobierno a asigna team pa acudi na e lugar pa mira con por yuda den cualkier aspecto cu por.  Prome Ministro di Aruba tambe a wordo informa di tur e acontecimento aki.  DOW a yuda pa pone baricada pa asina sostene cu mihor control riba trafico.

   A hasta manda unidad di Ambulans na e lugar pa ta riba standby den cualkier aspecto. 

   A bay usa Dompelpomp: Dado momento, esnan encarga cu comando pa cu combatimento di e candela, a tuma decision cu ta manda busca e poderoso ‘Dompelpomp’ cu Departamento di DOW tin na su disposion pa yuda ora cu tin inundacion den cualkier area di e isla.

   E biaha aki, a dicidi cu e Dompelpomp aki lo wordo usa pa saca awa for di lama, y usa esaki pa produci straalnan di mucho mas galon-pa-minuut cu por domina e candela na un forma mas rapido.

   Como cu e material cu ta kimando, ta produci un huma toxico pa esnan hopi cerca, dado momento BRA Rampenbestrijding y Crisis-Team a duna ordo pa evacua tur hende cu por ta eybanda.  Pues trabao a stop pa esnan cu ta labora na Apex Cement, como tambe esnan na Arugas, pa manda hende cas.

   Cuerpo Policial despues a pidi periodistanan cu ta den e area, pa bay aleha un tiki mas, y esaki pa nan propio seguridad.

   E candela aki kizas a start debi na un reaccion quimico di metalnan, cu a haya cualkier acelerante, incluyendo temperatura cayente di Diamars merdia, pa start e candela.  Hopi biaha awa so no ta paga un candela, pero tin di purba basha santo riba dje.

    Update: Den oranan di atardi, Bureau Rampenbestrijding Aruba (BRA) a yama un conferencia di prensa pa duna un update general di e situacion. Segun representante di Brandweer, e prioridad ta bienestar di habitantenan y a pidi pa keda leu di nan casnan te cu por lo menos 9'or di anochi. Por a wak cu e color di huma cu ta trata di huma kimico cu por ta peligroso pa salud. Brandweer a tuma nota cu no ta solamente hero bieu sino autonan bieu cu tin asiento, taira, por ta tin diesel y gasolin, cu ta un peliger tanto pa bomberonan, pero tambe comunidad. Pa 6'or di atardi, Werleman a indica cu e candela por ta bao di control den 2-3 ora, pero nan lo sigui vigila e area. Nan a purba di causa menos molester posibel pa comunidad. Nan a cera un area di por lo menos 500 meter, den caso cu cualkier material por a causa un explosion.

   Personal di ImSan tabata presente pa controla salud di bomberonan y haci loke ta conoci como un 'rehab' pa nan por descansa y asina sigui cu nan trabaonan.   

   DVG a conseha becindario di Mahuma y Ser'i Teishi pa evacua temporalmente, principalmente ciudadanonan cu ta sufri di malesanan respiratorio ta prudente pa nan bay keda cerca famia of amistad temporalmente. Esaki debi cu biento a ocasiona cu e fuma conteniendo material toxico ta bayendo den direccion di casnan habita.

   Señor Rino Hermans, director di Bureau RampenBestrijding a indica cu e preocupacion mas grandi tabata Arugas, mirando cu cayente y gas no ta un bon combinacion. El a splica cu tabatin un momento entre 12:30 cu 4:30 cu e risico tabata hopi halto, te ora Brandweer a indica cu nan a controla y proteha Arugas.

   El a enfatiza riba e bon comunicacion y coordinacion di tur instancia envolvi, cu a traha hunto pa percura pa siguridad di comunidad y normaliza e situacion mas lihe posibel.