Minister Dangui Oduber --- *Turismo crusero tambe ta recuperando
ORANJESTAD (AAN): Minister Dangui Oduber a indica cu diamars mainta Aruba a mira un dia grandioso unda cifra ta mustra cu a ricibi mas di 10.000 turista crusero ariba nos dushi isla.
E turistanan aki tabata procedente di diferente crusero, entre otro 'Allure of the Seas' di Royal Caribbean Cruises y tambe Carnival Cruise Lines.
Ta importante pa enfatisa cu e turista crusero ta hunga un rol importante den e recuperacion y progreso di Aruba su economia, y pesey Gobierno di Aruba ta traha continuamente pa sigui desaroya e mercado aki.
Minister di Turismo y Salud Publico Sr. Dangui Oduber ta satisfecho di mira tur e actividadnan den centro caminda hopi turista a yega nos isla. E turistanan aki ta crucial pa nos economia, creando hopi trabou pa taxista, tour operators, restaurantnan y tiendanan.
Aruba ta recuperando y progresando, y e mandatario tin tur confianza cu Aruba ta den bon direccion. No obstante cu e 'low season' pa turismo crusero, por mira hopi actividad pa e turismo crusero cu un cantidad substancial di turistanan.
E proyeccionnan pa e temporada halto di turismo crusero ta mustra hopi prometedor y ta indica cu lo por recupera 70% di e turismo crusero den comparacion cu aña 2019.
Turismo ta keda un driver importante di nos recuperacion economico y Minister di Turismo y Salud Publico lo keda traha duro pa fortifica esaki.
