Campaña pa combati trafico humano ta hopi importante y e tema mester haya atencion continuo

ORANJESTAD (AAN) – Minister di Husticia mr. Andin Bikker, a hiba palabra den conferencia di prensa, den e cuadro di e tema “Trafico Humano”,

unda cu ta coriendo un campaña di concientizacion, cu a cuminza Dialuna cu a pasa.

Prome cu e Premiere di e pelicula “Otro banda di lama”  e dignatario a papia di curazon, manera el a expresa, y no door di un spech traha, pasobra e ta uni su mes na e palabranan y e trayectoria cu a wordo describi, ampliamente, door di Minister Presidente.

E mandatario a haci un observacion tocante locual e ta ripara pero hopi hende no ta realiza. “Aki na Aruba, nos ta un pais cu responsabilidadnan internacional, pero hopi biaha no ta realiza cu ta e mesun persona, por ehemplo den e caso aki, señora Richardson- Baars, cu ta hefe di Scol di Polis ta e persona cu tambe ta coordinador di ‘mensenhandel y mensensmokkel’. Hopi biaha e mesun ‘vijfhoek’ di husticia cu ta reuni tur siman, cual ta atende cu prevencion di criminalidad comun, ta esun cu tambe ta atende cu e tema ‘mensenhandel mensensmokkel’.

Ora nos biaha bay Washington, nos ta reuni cu Departamento di Estado y Departamento di Husticia, hopi biaha nan  no ta realiza cu nos gruponan di persona cu ta desplega e trabao riba diferente ambito y tereno, ta mesun personanan cu un rato mester kita e pechi di combatimento y prevencion di trafico humano y bisti otro pechi di preveni criminalidad comun, of instrui nos futuro polisnan na Instituto di Polis”, Minister di Husticia a señala.

Minister Bikker a expresa cu e ta sumamente orguyoso di un Isla asina chikito, pero cu manera nos Himno Nacional mes ta bisa, cu calidadnan asina grandi, e personanan cu ta habita e isla aki, e capital humano, e recursonan humano, ta grandeza di nos pueblo. “Y p’esey mi hopi gradici na cada un cu a pone nan granito di arena pa e tema akinan.

E tema aki ta hopi complica. Aworaki mi tabata comenta cu un persona cu a acerca mi, cu mi ta haya e campaña aki sumamente importante, pasobra un di e articulonan di nos Codigo Penal, cu ta 239, e descripcion di kico ta mensenhandel y mensensmokkel, ta hopi amplio, y lamentablemente, tin biaha personanan door di falta di informacion, nan no ta realiza cu nan no ta bon bezig. Anto pesey e campaña aki di concientizacion ta hopi importante. Nos a bin pa hopi aña caba ta trahando riba e tematica aki caba, tin tratado y convenionan cu a wordo cera cu, entre otro Merca, cu ta un di e partnernan mas grandi den esaki”, e mandatario a menciona.

El a agrega cu aworaki, danki na Minister Presidente Wever-Croes y na Hulanda, Aruba a haya fondonan adicional pa por a dedica na e tematica aki, pasobra hopi biaha por tin hopi ambicion pa loke ta trata un maneho, pero si no tin fondonan acopla na dje, hopi biaha no por duna atencion debi na dje.

Minister Bikker a expresa cu, cu hopi honor Diamars aki lo trata den Conseho di Minister un proposicion di su persona, pa por formaliza e CMEA, pa e por bira sea un departamento cu ta un unit dedica of un departamento riba su mes, pa asina por sigui dedica na e tema aki cu ta uno cu ta surpass cualkier gabinete, y mester dune atencion continuamente.