ORANJESTAD (AAN): Fundacion Diabetes Aruba ta bay inicia un biaha mas, awor cu sosten di Pan-American Health Organization (PAHO),
e proyecto PRISMA pa personanan cu diabetes tipo 2.
Dr, Sharline Vis, presidente di e fundacion a splica dialuna durante un rueda di prensa cu e proyecto aki ta enfoca riba e pashent mes, esta e hende y su problemanan individual den e maneho di diabetes.
Tin hende cu tin problema den e manera pa bay haci movecion y tin otro hende cu tin mas problema cu haci cambionan den e manera di alimenta nan mes.
E curso aki ta hopi bon pasobra e ta tuma lugar den un grupo chikito di hende y tin atencion pa e hende individual. E ta wordo duna di un forma interactivo y cu participacion di e hendenan mes den e programa. Tur ta enfoca riba loke nan kier saca di e programa y loke nan kier cambia den un plan cu nan por haci pa bin cu cambionan den nan estilo di bida, pero cu por 'trigger' cambionan despues mas grandi, Dr. Vis a splica.
PRISMA ta un programa specialmente pa persona cu diabetes tipo 2 cu kier tuma control di su salud, tin mihor maneho di diabetes y kier preveni otro complicacionnan di salud.
Fundacion Diabetes tin como mision pa crea e transformacion den e concientisacion den colaboracion cu otro stakeholdernan di salud.
E fundacion kier empodera e hende mes cu mester bin cu e cambio pasobra como docter di cas of otro profesionalnan manera dietista por bin cu henter un letania y pusha, pero e cambio no ta bay bin asina un hende bisa bo pa haci algo. E cambio tin cu bin di paden, Sharline Vis a remarca.
El a agrega, relaciona cu un pregunta cu DIARIO a dirigi na e panel di profesionalnan, cu nan kier focus hopi riba prevencion, principalmente pa no desaroya e malesa.
Sinembargo mester remarca cu tin tratamentonan of guia cu no ta wordo cubri pa AZV, por ehempel, ora cu un persona kier haya conseho di profesionalnan pa yuda mehora nan salud.
Vis a indica cu e programa PRISMA aki tambe tin un programa cu ta pa pre diabeticonan. Ta trata di hendenan cu tin riesgo pa haya diabetes. Edad ta hunga un rol manera tambe sobrepeso.
Ta bon cu hendenan lo kier ta motiva pa ataca esaki y traha riba esaki na tempo.
Dr. Vis a lamenta cu no tin e programa aki ainda aki na Aruba, pero e ta spera cu esaki lo por ta posibel den futuro ya cu tin hopi hende pre-diabetico. Ta keda enfoca riba e parti di estilo di bida y ta ripara cu tin hende cu mester di informacion pa haci cambionan den nan alimentacion.
E ta bolbe reitera cu lamentablemente esey no ta den e pakete di AZV. Pero pa esaki mester pone fondonan disponibel pa por consulta nutricionistanan, por ehempel.
Tambe ta bon pa keda pendiente di e programanan di Fundacion Diabetes Aruba cu ta wordo realisa cu Aruba Doet of riba dia internacional di diabetes unda ta duna mas informacion como tambe programanan di cushinamento of alimentacion saludabel.
E parti importante ta cu kier haci cambio y relaciona cu esaki semper por contacta e fundacion y haci pregunta na This email address is being protected from spambots. You need JavaScript enabled to view it..
