Campaña di 'Carnaval Safe' pa carnaval 71 a duna inicio cu enfoke riba mayor di yiu chikito y hoben

ORANJESTAD (AAN)— Durante un actividad den Tienda di Educacion, e Orthopedagoog di Departamento di Asunto Social,

señora Yvonne Geerman-Bermudez, a splica DIARIO, cu asina aki a duna inicio na e Campaña di Carnaval Safe pa tur mucha y hoben, pa carnaval 71.

E campaña aki ta wordo dirigi door di Comision Vision Pedagogico cual ta activo for di 2016, y e organizacionnan cu ta forma parti di dje ta Tienda di Educacion, Fundacion pa Nos Muchanan, Fundacion Respeta Mi, Stichting Wit Gele Kruis, y Departamento di Asunto Social.

            “Nos meta ta brinda sosten na mayor durante henter aña. Nos ta traha riba prevencion, na concientiza mayornan y durante carnaval esaki no ta un excepcion”, Geerman-Bermudez a splica.

            El a agrega cu e aña aki lo enfoca riba mayornan di muchanan chikito locual nan ta haciendo for di 2023, y e aña a amplia e campaña enfocando riba mayornan di e hobennan.

            “Pa cada un nos a bin cu siete punto di enfoke unda nos lo ta partiendo informacion y fliers unda nos ta poniendo atencion riba e siete puntonan aki, y nos lo kier duna mayornan tips pa nan ta bon prepara prome cu nan sali bay riba cualkier evento di carnaval” e Orthopedagoog a bisa.

            El a agrega cu ultimo añanan por a ripara cu tabata tin basta situacion menos bon ta pasando. “Prensa a comparti esaki tambe cu nos, y tambe nos a haya sa di nos partnernan, entre otro, Cuero policial y nos como Comision kier duna informacion e aña aki na un manera mas grandi. Y nos ta gradiciendo p’esaki WEB Aruba NV, cu ta bay sponsor nos cu productonan cu nos ta bay reparti riba caya. Nos ta bayendo cu fliers, riba medionan social, c’un jingle cu ta saliendo pronto y nos meta ta pa pone atencion. E ta un temporada dushi pa celebra, pero loke nos ta desea ta celebra conciente: celebra cordando cu bo ta un mayor, bo ta suppose di ta un ehempel, pa bo yiu durante cualkier evento, cualkier parada”, Yvonne Geerman-Bermudez, Orthopedagoog di Sociale Zaken, a enfatiza.