ORANJESTAD (AAN): Despues cu e ministernan a huramenta diabierna mainta, e Gabinete a sali na presenta,
durante e reunion publico diabierna merdia, un nota di cambio y despues di e aprobacion di e presupuesto 2025, e Gabinete no a perde tempo.
A cuminsa dialuna mainta cu un limpiesa rond di Juliana- y Reina Beatrix school.
Diabierna anochi pa diasabra marduga ya pueblo di Aruba por a sinti un aire fresco di cambio cu ta supla riba nos dushi isla.
Diarason, 2 di april 2025, Gabinete AVP-FUTURO ta marca un logro significante - un cu ta beneficia nos grandinan directamente.
Nos ciudadanonan di edad avansa, TUR nos pensionado cu ta depende di asistencia financiero pa cumpli cu nan obligacionnan mensual y mantene un bida digno, awor lo ricibi un reparatietoeslag di 250 florin entrante 1 mei benidero. Un prome paso pa un seguridad financiero mas grandi.
Un palabra di pabien na nos grandinan y na Gabinete AVP-FUTURO pa e iniciativa significativo aki.
Banda di e reparatietoeslag lo introduci un descuento di 10 cen pa liter riba productonan petrolero.
Cada Gabinete tin su maneho di gobernacion, y Gabinete AVP-FUTURO a compromete pa haci cambionan necesario pa trece un alivio real pa e pueblo di Aruba. Nos comunidad merece progreso -- un cu ta garantisa bienestar financiero banda di e crecemento economico di e pais.
For di Parlamento, mi lo sigui vigila e accionnan di Gabinete AVP-FUTURO cu un wowo skerpi y vigilante.
