Eventonan di Carnaval 2024 na Aruba ta entrega un mensahe na mundo
*Celebracion den logro sigur ta prueba di gratitud pa loke a ricibi
ORANJESTAD (AAN) — E eventonan di Carnaval durante fin di siman, a bira e forma cu Aruba a entrega na mundo e realidad, cu nada ta kibra e animo positivo di Aruba.
Ta cu un aplauso awe nos ta recompensa e actividadnan cu a tuma lugar na Aruba, cu ta entrega prueba na mundo, cu si un hende of un pais kier duna prueba di su gratitud pa loke el a ricibi, e ta expresa esaki den alegria.
E produccionnan di Pueblo di Aruba den e temporada di Carnaval, ta un inspiracion pa henter mundo, cu ta mira con Aruba a bandona cueba di problema, pa den union total, celebra Carnaval y sigui dilanti cu animo.
Awe den tanto cos malo cu ta pasa na mundo, e ehempel cu Pueblo di Aruba ta entrega, ta duna prueba di Arubianismo, cu ta duna hende fe pa sigui cana bay dilanti y no laga ningun problema of adversidad, destrui futuro cu ta spera pa tur cu traha y den posivitismo.
Sin duda bishitantenan di Aruba mester a wordo contagia cu e animo cu ta biba den Pueblo di Aruba, cu no a permiti problemanan sumamente grandi destrui su animo y duna prueba cu e ta kere den futuro.
Naturalmente tabata tin un grupo chikito cu a trata na daña ambiente. Pero kico un grupo chikito por haci contra e multitud di mayoria di Aruba, cu a duna prueba di e animo cu a haci cu Aruba a bandona problemanan, cu paisnan grandi tin problema pa soluciona.
Ultimo diez aña no tabata nada facil pa Aruba, cu mester a haci sacrificio grandi pa enfrenta e laman di problema en espera di solucion.
Aruba a confronta uno di e crisisnan mas grandi y mas doloroso den su historia na uno di e momentonan cu el a pensa e ta bay recupera di uno di e caidanan financiero mas grandi cu e pais a conoce.
Ta cu un debe nacional riba su lomba, Aruba mester a confronta Covid-19 cu a destrui su economia.
E calidad di lider cu Aruba tabata tin na momento, cu e pandemia a bati na porta, ta papia pa su mes si mira e Aruba di awe, cu yena cu alegria ta celebra atrobe un Carnaval, na un nivel ehemplar pa henter mundo.
Tabata sumamente emocionante pa mira sigur e muchanan di Aruba, baila rumbo pa un futuro cu tabata asina scur algun aña pasa.
Aruba tabata un union total, un Pueblo cu tabata duna prueba na mundo cu positivismo, fe y un animo cu nada por kibra, tabata e instrumentonan cu hunto cu un liderazgo historico, a produci e imagennan di un Carnaval.
Aruba, yena cu gozo, cu alegria cu ta contagia cualkier persona obhetivo, tabata duna prueba na mundo, cu atrobe Aruba a logra trapa riba tur obstaculo cu ta strobe su felicidad y alegria.
E presentacion di e muchanan, di e futuro di Aruba, awe ta motibo di animo pa e Pueblo di Aruba, cu no tin miedo di lucha como antesala di logro, cu awe ta pone henter mundo respeta un Aruba recupera.
Awe e momento a yega pa duna un aplauso na liderazgo na Aruba, cuminsando na e cuna di Arubianonan, cu ta nace y crece cu e animo pa sigui cana na e momentonan mas dificil cu por presenta.
E organisacion total cu por a mira den e temporada di Carnaval na Aruba, ta papia aki di e forma cu responsabilidad cu ta base di liderazgo, ta haya contenido.
Carnaval 70 na Aruba ta culmina den un celebracion cu te awor ta grandioso a base di e trabou enorme cu a wordo desplega tras di cortina den gobernacion, den seno di dirigentenan di tur instancia responsabel riba tur tereno na Aruba, cu ta entrega mundo atrobe e prueba, cu nada ta destrui e animo y positivismo di e Arubiano!
