Prome Ministro Evelyn Wever-Croes ta entrega Aruba mas victoria
*Gobierno di Reino no ta honra peticion di Comision di Supervision
*Den crisis mundial paisnan di Reino ta confirma liderazgo Wever-Croes
ORANJESTAD (AAN) - Ayera, Diabierna 21 di October 2022, a bira un fecha historico pa Aruba na momento cu Gobierno di Reino e expresa su confiansa den e maneho di Evelyn Wever-Croes, cu a entrega Aruba otro victoria.
Kico tabata na wega ayera durante e reunion di Conseho di Ministro di Reino? Gobierno Wever-Croes no por a bay di acuerdo cu e proposicionnan di e Comision di Supervision Caft y a desvia di e exigencianan di Caft den calculacionnan di e cifranan di entrada y gasto di Aruba na 2022.
A surgi un situacion di conflicto entre e comision cu oficialmente mester duna direccion na maneho financiero di Aruba y Gobierno Wever-Croes y Caft a pidi Gobierno di Reino pa entrega un aanwijzing na Aruba.
Esaki lo a nifica cu e cifranan pa gasto y entrada di Aruba na 2022, pa medio di Gobernador, lo a wordo saca for di man di Aruba a base di un decision di Reino.
Un aanwijzing pues ta un intervencion directo di Reino pa sigura bienestar financiero di e pais y na 2014, aanwijzing a wordo duna na Gobierno Eman.
Na Aruba lamentablemente, e hecho cu Gobierno di Aruba na 2022 a na mas ocasion a mustra cu su maneho ta solido y confiabel y a actua a base di su decisionnan enfrente entre otro pago di 5 porciento na trahadornan di Gobierno, a wordo uza dor di politiconan na Aruba pa crea desconfiansa den Gobierno Wever-Croes.
Durante vacacion grandi 2022, mientras un crisis mundial severo tin mundo den su gara, e decision di ta kita e responsabilidad financiero di Aruba for di Gobierno di Aruba y pone den man di Reino pa asina honra e peticion di e Comision di Supervision, a keda pendiente pero tambe a wordo uza como arma politico contra Gobierno Wever-Croes dor di oposicion.
Ayera tabata e dia grandi y informacionnan for di Hulanda tabata indica cu Reino lo duna sosten na Prome Ministro Evelyn Wever-Croes y su Gabinete.
Importante tabata e lucha di Prome Ministro Wever-Croes cu a uni su vacacion na Hulanda cu e trabounan necesario pa por a transforma e presupuesto 2022 como un base pa Aruba atende cu su finansas.
Na hopi ocasion e Ministro di Asuntonan Financiero di Aruba, Xiomara Maduro, a duna Pueblo di Aruba tur informacion necesario.
E ultimo lunanan den seno di Reino mes, a crea basta suspenso ya cu e persona di Prome Ministro Evelyn Wever-Croes ta wordo considera como experto y guia pa tur pais Caribense cu ta parti di Reino.
Ayera Aruba a canta victoria na momento cu Gobierno di Reino a dicidi cu no ta duna Aruba aanwijzing.
Esaki a nifica cu Gobierno di Reino a sostene Evelyn Wever-Croes como lider responsabel den e maneho financiero di Aruba y e persona suficientemente capaz pa entrega Aruba un maneho propio.
E decision di Reino ayera tin un impacto sumamente importante pa Aruba pero pa tur pais den Reino pasobra e instancia cu a pidi Gobierno di Reino pa kita e responsabilidad financiero for di Gobierno di Aruba, tabata Caft, encarga cu supervision di Aruba for di tempo cu Gobierno Mike Eman a herida e situacion financiero di Aruba casi mortalmente.
Ayera a keda demostra cu Reino Hulandes tin tanto fe y confiansa den e capacidad di Prome Ministro Evelyn Wever-Croes, cu Gobierno di Reino a rechasa e peticion di Comision di Supervision loke ta algo sumamente grandi.
Pasobra Gobierno di Reino di tal forma a splica Comision di Supervision cu “Gobierno Wever Croes por dirigi Aruba na un forma responsabel”.
E victoria di Aruba ayera den Reino no ta deshaci di e trabou valioso di Supervision den temponan sumamente dificil pa mundo, pero si ta mustra cu Aruba tin un lider cu por dirigi Aruba na un forma corecto.
Mientras partido di mr. Evelyn Wever-Croes ta prepara pa oficialisa continuacion di e actual Prome Ministro di Aruba como lider di partido MEP, un victoria historico ta wordo entrega na Aruba como ehempel pa tur otro pais den Reino, caminda manera DIARIO a comprende e logro di Aruba ta wordo considera como un paso importante pa futuro di Aruba y henter Reino Hulandes.
Den seno di Reino, mr. Evelyn Wevero-Croes a wordo conssagra como lider capaz y responsabel di su pais, Aruba cu a skirbi historia atrobe.
