CAft a conseha pa cobra bek tur Subsidio di Salario duna di mas

ORANJESTAD (AAN): Manera DIARIO a trece dilanti caba, durante e reunion publico pa legalisa e sosten financiero duna den forma di Subsidio di Salario den aña 2020 y 2021,

Minister Wever di Economia a informa riba e suma di 72 miyon Florin cu a worde duna di mas na Subsidio di Salario. E mandatario a splica cu e suma aki lo worde cobra via SVb y pa cu esaki lo tin un areglo di pago pa e companianan cu mester debolbe e yudansa brinda, teniendo cuenta cu e capacidad di pago di e compania. Riba e topico aki recientemente CAft a duna conseho na Gobierno pa e Subsidio di Salario duna di mas, bay den caha di Gobierno.

   Consehonan di CAft 24 y 29 november: Dia 24 di november den reaccion riba e Uitvoeringsrapportage URK3, CAft a pidi Gobierno pa raporta den URK riba e cobransa di Subsidio di Salario y integra esaki den administracion di Pais Aruba. Dia 29 di november den nan reaccion riba e concepto di Presupuesto 2022, CAft a pidi Gobierno pa 1.) Traha areglo di pago pa esnan cu mester debolbe Subsidio di Salario, 2.) Caba di ehecuta e control di aña 2021 promer cu 1 di april 2022, y 3.) Hinca e suma cu worde cobra den caha di Gobierno via un Cambio di Presupuesto 2022.

   Cobransa ta den man di SVb:  Den e Ley Di Subsidio di Salario e autoridad pa cobra e subsidio duna di mas, ta worde pasa pa e director di SVb. Dentro di poco tur compania cu mester paga lo worde acerca cu un proposicion pa haci pago.