Cada monumento restaura den su gloria ta conta nos su historia

Ministro Xiomara Maduro ta orguyoso

ORANJESTAD (AAN): Durante e periodo di gobernacion di Gabinete Wever-Croes I y II, bou di e liderazgo di Minister Xiomara Maduro di Cultura varios trabao di restauracion y mantencion di monumento a worde ehecuta pa Monumentenbureau Aruba y Monumentenfonds Aruba cu aprobacion di Monumentenraad Aruba. A rescata casnan tambe pa conserva nan como monumento di Pais Aruba. E prome monumentonan priva tambe a keda seya of a inicia e proceso pa nan haya nan seyo di monumento protegi di Pais Aruba.

    Restauracion a tuma luga na Botica Aruba, Zuidstraat 7, Maria Convent, Warda di Polis Savaneta. Trabaonan di restauracion lo tuma luga tambe na Dakota Airport, ex edificio di DOW y na Cas Veneranda.

    Mantencion a tuma luga na Ecury Complex, Watertoren Oranjestad, Nicolaas Store, Forno di Calki, grafnan di Commandeur, School 1888, Stadshuis, Edificio di Corte, California Lighthouse, Henriquez Pand, Weststraat 15 y pronto e edificio na Zoutmanstraat lo keda debidamente manteni.

    A rescata y conserva ‘Cas Tan Tin’ como e prome cas di cunuco cu ta keda conserva como monumento pafo di cuidad. Tambe Cas Veneranda ta bay haya su seyo como monumento protegi di Pais Aruba. E interior di Kapel di Betania tambe ta worde conserva pa posterioridad.

    E prome monumentonan priva tambe a keda proteha, esta Dakota Airport cu pronto lo worde restaura den su gloria y Kapel di Alto Vista cu ta keda conserva como refugio religioso di nos Pais.