Otmar Oduber
ORANJESTAD (AAN): Durante conferencia di prensa, Secretario General di PPA, Otmar Oduber a elabora riba e ultimo encuentronan sosteni cu entre otro SVb y AZV y tambe riba e ultimo rapportnan conoci pa loke ta trata salubirdad publico na Aruba.
El a indica cu salubridad publico ta un di e tres puntonan principal cu PPA ta enfocando riba dje hunto cu Plataforma Nos Pais. Durante e diferente encuentronan por a tuma nota di e disgusto cu tin den comunidad pa cu e calidad di servicio cu tin den medicina na e momentonan aki. E tempo di espera pa por wak un specialista na Aruba ta algo inhusto, e echo cu mester warda 3 pa 6 luna, of tin biaha mas, pa por wak un docter na nos isla ta algo cu no ta aceptabel mas.
P’esey Otmar ta enfoca riba e echo cu mester pone un deadline di10 dia of 2 siman pa un persona haya afspraak cu docter. Esaki lo pone un presion riba AZV y e ta conciente di esaki, pero e realidad ta cu ora ta trata di salud di hende no por bisanan cu pasobra no tin un dokter of pasobra AZV no tin placa, anto e ora tin cu warda 3 of 6 luna pa wak un problema di wowo , di curason of malesa cronico. Den situacionnan asina, loke hopi hende ta haci, ora nan por, ta subi avion y bay exterior pa busca nan salud.
“Nos ta bisa cu esaki no ta aceptabel y manera nos a presenta caba den e plan, esaki ta encera cu AZV tin cu bay habri su portanan. Nos ta e plataforma y partido cu a papia riba diversifica y habri e industria di salubridad aki na Aruba, trece mas competencia na Aruba y crea incentivonan pa esaki tuma lugar y naturalmente percura pa AZV carga su responsabilidad di tin suficiente dokternan, di tin emedicinanan necesario pa nos comunidad y percura pa duna un servicio tambe di un calidad prima na nos comunidad”, Otmar Oduber ta expresa.
