‘Cada famia tin un parti di historia di Aruba cu merece di wordo conserva’

‘Cada famia tin un parti di historia di Aruba cu merece di wordo conserva’

Parlamentario Xiomara Maduro:

ORANJESTAD (AAN): Parlamentario Xiomara Maduro di MEP ta haci un yamada na famianan Arubano pa documenta nan historia, conserva potretnan bieu y registra recuerdonan di nan antepasadonan. Segun Maduro, cada famia tin historianan valioso cu ta forma parti di nos identidad cultural y cu no mag bay perdi.

   E yamada ta sigui despues cu Maduro a presencia e documental ‘Affiba – De Oudste Vrouw van Paramaribo’, di cineasta Ida Does. E obra ta mustra con investigacion genealogico di Joan Windzak a logra reconstrui historia di su antepasado Affiba Dompig (1792–1896) y duna identidad na e muhenan den un potret historico di cinco generacion.

   Segun Maduro, e documental ta un inspiracion pa Aruba, unda hopi famia tin historianan di migracion, trabao, sacrificio, tradicion, amor, perseverancia y contribucion na desaroyo di nos isla cu ainda no a wordo documenta.

   “Mi kier encurasha famianan pa sinta cu nan mayornan, scucha nan recuerdonan, skirbi nan historianan y conserva nan potretnan bieu cu nomber, fecha y luga. Cada potret tin un historia y cada famia tin un herencia cu merece di wordo comparti cu generacionnan futuro.”

   Maduro ta enfatisa cu historia di Aruba no ta limita na loke ta registra den bukinan y archivo. E ta biba tambe den nos casnan, nos tradicionnan y e recuerdonan cu ta pasa di generacion pa generacion.

   Maduro ta gradici Fundacion Museo Arubano (FMA) pa e presentacion di e pelicula Affiba na Principal Theater den cuadro di E Testigo Silencioso, y ta felicita Ida Does y Joan Windzak pa nan contribucion na preservacion di memoria historico.

   “Ora nos conserva historia di nos famianan, nos ta conserva historia di Aruba. Pa sa ken nos ta, nos mester conoce di unda nos ta bin.”