ORANJESTAD (AAN): Manera ta tradicion caba na Colegio Bon Bini na Madiki, cada aña nan ta organiza Caminda di Cruz riba tereno di scol mes pa e temporada di Cuaresma.
Pero e biaha aki na 2023, segun cabezante Sherissa Tsu a indica, cu nan a wordo acerca door di Instituto IKDA pa nan expande e tradicion aki na un forma mas interactivo.
Instituto Kateketico Diosesano Aruba (IKDA) a mustra di tin hopi interes pa mantene e alumnonan extra envolvi den e Caminda di Cruz, y nan a suministra costume y mas pa asina haci e Caminda di Cruz aki bira uno ‘mas bibo’. Alumnonan di scol mes a participa den diferente sketch cu nan a actua dilanti lokaalnan.
Colegio Bon Bini ta cay bao di SKOA, y como scol Catolico, e organizacion di un caminda di cruz no ta haci falta. Y awor na 2023, nan a haci esaki mas diferente, unda a agrega parti di drama den dje usando e storia di Bijbel, y e alumnonan a presencia esaki y a keda hopi encanta.
Alumnonan a haya esaki algo unico, mas diferente compara cu tur aña. E materia di religion ta haya hopi enfoke na Colegio Bon Bini, segun cabezante Sherissa Tsu a indica.
El a ricibi bon reaccion di e alumnonan y demas docentenan riba e Caminda di Cruz diferente aki.
https://diario.aw/categories/noticia/general/cabezante-di-colegio-bon-bini-mustrando-cu-e-scol-a-biba-hunto-cu-e-caminda-di-cruz-bibo#sigProIde04e52be3c
