Cabayero a perde tur cos den candela di su Casita na Modanza

ORANJESTAD (AAN): Diabierna mainta poco prome cu 11:40 am, a drenta notificacion tanto na Polis como na Cuerpo di Bombero, cu tin un Casita na candela na Modanza.

   Polis y Bombero a yega y topa cu e Casita aki traha di bloki y palo, pero rondona pa plachinan di zim, tabata full na candela.  A bin haya sa cu parti patras di e cas den un sorto di werkplaats, e doño di cas tabata haciendo reparacion na un mueble of un corchon, y diripiente candela a start eynan.  Y e candela aki a expande rapidamente.

   E huma diki produci pa e palonan eynan, a pone cu mesora varios hende di diferente bario por a mira cu tin un candela grandi andando.  E huma aki hasta a pone dos hende bira malo, y pesey presencia di Ambulans a wordo pidi.

   Bomberonan a yega cu dos unidad, y a cuminza basha awa pa asina paga e candela na e Casita, y tambe e werkplaats.  E problema di mas grandi ta presencia di asina hopi plachi di zim, y dado momento un Bombero tambe a keda herida door cu zim a cay y dal den dje.  E tambe a wordo hiba cu Ambulans pa Hospital.

   E cabayero cu ta biba eynan, a perde tur cos.  Tur su paña, tur zapato, cuminda, y tambe cuminda pa su dos cacho mascota cu e stima hopi.  E cabayero ta bisti size 6 of 7 di zapato, y carson ta size 28.

   Esnan cu por duna un man, ta ser pidi pa coopera cu e cabayero aki cu awor ta ricibiendo sosten di e bisiñanan.