Buskeda pa husticia y claridad ta sigui despues di mas cu 10 aña

Caso di Poentje Castro:

• Sentencia interesante aki seis siman
• Interes cerca hurista di Aruba aworaki na Hulanda 

ORANJESTAD (AAN): E caso di John Anthony Castro, conoci pa pueblo henter como ‘Poentje Castro’, periodista Arubiano cu a worde haya morto na 2010, ta un sucedido cu ta trece hopi tristeza y preocupacion den comunidad periodistico di Aruba. Mas cu diez aña despues di e crimen, e caso ainda no a yega un punto di husticia definitivo.

   Sr. Luis Villegas, cu den pasado tabata periodista freelance na Aruba, y cu awor ta un hurista studiando pa obtene su Master’s den Staats- en Bestuursrecht na Universidad di Amsterdam, a tuma gran interes den e caso aki y e forma con e investigacion a bay.

   El a splica cu prome biaha cu el a tende di e caso, e tabata na Hulanda, atraves di un publicacion cu a worde haci en conexion cu Dia Internacional contra Impunidad pa crimen cometi contra periodistanan. ”Mi a keda impacta di sa cu un periodista Arubiano a worde mata 10 aña prome y cu despues di tanto tempo, no tin persona cu a worde haya responsabel,” asina Villegas a bisa.

   Haciendo uzo di e conocemento cu sr. Villegas tin el a presenta un peticion formal na gobierno Hulandes pa haci documentonan di e caso aki publico (WOO-verzoek), pasobra durante e proceso forensico cu a worde haci na Aruba, un instancia Hulandes tabata involucra. Aunke no tur documento a worde entrega, e informacion cu a surgi a mustra cu tabatin problema serio di comunicacion entre Aruba y Hulanda, cu a contribui na e atraso di e investigacion.

   Den e proceso pa sigui e desaroyonan di cerca, sr. Villegas a bay corte na Hulanda despues cu Ministerio di Husticia Hulandes a rechaza di duna/ publica cierto documento. Durante e proceso aki, sr. Villegas a tuma nota cu e caso a bolbe cuminsa move, y un investigacion nobo a worde habri. Pero e corte a determina cu no tabatin suficiente prueba pa condena e sospechoso cu Ministerio Publico tabata kier a persigui. Segun e documentonan cu a surgi te cu awor, tabatin evidencia cu durante e investigacion original hopi material a perde, incluso documentonan y pruebannan forensico, y e dossier no tabata completo.

   Tur data di e BlackBerry: Sr. Villegas a enfatisa cu su intencion principal ta pa sigui pidi atencion pa husticia pa Poentje Castro: “E crimen aki no ta solamente un tragedia personal, sino un golpi pa libertad di prensa na Aruba. Si un periodista por worde mata y despues di dies aña ainda no tin husticia, kico e mensahe ta pa esnan cu kier sigui haci periodismo critico?”

   Raad van State tabata hopi critico riba e manera cu e Ministerio di Husticia a maneha e caso, y ta spera cu e documentonan di Nederlands Forensisch Instituut (NFI), incluso e analisis di e Poentje Castro su BlackBerry smartphone cu ta contente e ultimo mensahenan cu el a ricibi, y pruebannan forensico di e sitio di crimen cu ta inclui paña cu mancha di sanger, lo por finalmente worde publica. Na e momentonan aki ta sperando e uitspraak di Raad van State aki seis siman, sr. Villegas a termina bisando.