Presidente di Parlamento, Marlon Sneek:
- Instala comision pa traha documento como base pa yega na tratonan igual
ORANJESTAD (AAN): Durante su bishita na Hulanda principalmente pa atende IPKO, Presidente di Parlamento, Marlon Sneek hunto cu coleganan parlamentario, a tuma parti di varios reunion importante y relevante riba topiconan actual.
Un topico cu a atende ta e diferencia, e deficit democratico, cu ta existi den paisnan den Reino, Mientras nos tin un Gobierno di Reino y den e Reino ey tin 4 pais. Pa cu esaki, Presidente di Parlamento Sneek a indica, cu a instala un comision cu ta consisti di un experto di cada pais cu lo traha riba un documento cu lo bira e base ora ta trata diferencianan y yega na tratonan mas igual entre e paisnan den Reino.
Señor Sneek a indica cu Parlamento di Aruba tawata e trekker di e Geschillenregeling pa e otro 3 Parlamentonan di e islanan Caribense den Reino. E Geschillenregelling a keda entrega na Tweede Kamer pa asina e cuminsa su trayecto pa entre otro haya advies y e islanan por tin representacion tambe den Gobierno di Reino pa medio di e Minister Plenipotenciarionan kendenan lo atende cu e ley aki den su contenido.
Segun Sneek, a hiba discusionnan di e diferencianan cu tin den Reino y e formanan di trato diferente cu e otro islanan. Un ehempel di esaki ta e fiansa di Covid. Gobierno di Hulanda a duna como porciento di interes na St. Maartin mirando cu ainda Sint Maarten tin dificultad despues di e horcan ultimo. Corsou a haya 3,2 procent di interes y Aruba a haya 6.9 procent. Esakinan aki a pasa via un mocion cu a tuma luga den Tweede Kamer.
E presidente di Parlamento ta cuestiona e manera di midi di Hulanda ora di dicidi ken ta keda sin paga of ken ta paga mas. Segun Sneek, Gobierno di Reino mester duna garantia igual na Reino den su totalidad. “E mesun motibonan cu a wordo duna pa duna kwijtschelding, ta valido pa Aruba y Corsou tambe”, Presidente di Parlamento a expresa.
Señor Sneek a conclui bisando cu ta spera cu pa e siguiente IPKO cu lo tuma luga na februari na Aruba, e comision por tin informacionnan preliminario di e documento pa asina Parlamentonan por bay bek riba dje y por cuminsa corta e diferencianan, e deficit democratico, cu ta existi den Reino.
