Thomas Ruiz, Secretario di VRA
ORANJESTAD (AAN): Vereniging Rijscholen Aruba (VRA), a reuni recientemente cu señor Edgard Maduro, di Departamento di Examen Rijbewijs, cu ta un persona nobo cu a wordo poni p’ariba, pa dirigi e departamento.
Asina e Secretario di VRA Thomas Ruiz, a duna di conoce den entrevista cu DIARIO. El a comenta cu VRA a haya tende di su miembronan y di otronan cu a bay BER (Bureau Examen Rijbewijzen -KPA) cu nan ta bay bin cu un beleid nobo.
“Nan ta bay baha e cantidad di inscripcion y tambe ta bin cu yen di rekisito nobo. Y nos ta contento tambe cu señor Edgard Maduro a reanuda e dialogo, cu ta hopi importante, y asina por evita e cosnan cu ta pasa.
“E carta ta fecha 20 di Maart, cu nan a manda via email dia 24, y cu mester drenta na vigor otro siman. Dos cambio importante tabata cu nan ta bay baha e inscripcion di 10 pa 5 y tambe nan ta bin cu exigencia nobo, cu e rijschoolnan tin cu bin cu e identificacionnan original di e cliente. Kiermen, nos tin cu pidi nos clientenan pa laga nos cu e ID, e passport of e rijbewijs, pa inscribi”, señor Ruiz a duna di conoce.
Thomas Ruiz a menciona cu e motibonan pa e cambionan aki ta na prome lugar, falta di personal, di dos, pasobra algun di e agentenan ta bayendo opleiding. “Pues ta keda un persona so pa deal cu tur e inscripcionnan pa full Aruba”, el a subraya.
Ruiz a bisa cu VRA ta compronde berdad e druk cu tin pero gobierno a implementa un “Bestand Management Beleid” na unda cu nan ta controla e productividad di e persona cu ta traha pa gobierno.
“Locual cu nos ta compronde ta cu ta tuma diez minuut pa e agente policial aki procesa e inscripcionnan cu nos ta entrega. Si bo ta bay suma pa dia cuanto e ta haciendo y e añanan cu a pasa, cuanto nan a haci, si bo ta haya cifra di cuanto inscripcion tabata tin, por ehemplo, na 2023, cuanto herexamen tabata tin y cuanto dispensacion a wordo duna, nos ta bisa cu algo no ta cuadra”, Ruiz a indica.
El a agrega cu tambe VRA a puntra si nan a haya conseho of sosten di Departamento di Recurso Humano, tocante e productividad. E ta corda cu den un reunion BER a haya un impase cu Departamento di Recurso Humano, tocante nan productividad.
Ruiz a bisa cu si nan baha e inscripcionnan aworaki, no ta bay mira ningun cambio pasobra nan como rijschollen, cada un tin un dia vast pa entrega esakinan y despues di un siman ta bin bek busk’e ora nan ta cla, y locual cu nan ta haci ta cu envez di swipe tur e diez inscripcion di un solo biaha na BER, aworaki ta cinco so ta swipe y e otro cinco ta bin un pa un y nan ta wordo atendi atrobe den e rij largo cu a yega di conoce den pasado. “Kiermen, bo ta mandando nos bek den cuminzamento”, el a remarca.
Thomas Ruiz a bisa cu BER tin cu compronde cu nan ta dicta ki dia e persona ta bin busca su fecha di examen pa inscribi. Pero ken por bisa cu e persona ey por haya liber? Of cu e sistema ta down, of cu e persona aki ta bira malo, bo tin un rij di hende para. Nan ta traha ocho ora berdad, pero e departamento ey ta cera un ora mas trempan pa nan por procesa locual nan tin e dia ey. El a subraya cu esaki ta bay pa servicio tambe cu ta loke nan kier mehora, pero si wak e ultimo cifranan cu OM a publica. E cantidad di verbaal cu a wordo traha pa hende cu ta core sin rijbewijs ta ridiculamente halto!
