Falsificacion organisa di Coronapas na Europa otro reto pa autoridad - *E amor pa Covid-19 ta mas grandi cu e deseo pa come y biba trankil - *Rechaso di vacuna ta e porta principal pa drenta Cuido Intensivo y Santana
ORANJESTAD(AAN)—E prome parti di October 2021 ta tras di lomba. Halloween ta na caminda. Despues ta sigui Thanksgiving, Sinterklaas, Pasco, Cambio di Aña pa bay topa cu Carnaval.
Esaki ta e schedule aparentemente favorito cerca un grupo demasiado grandi, cu no solamente ta perhudica su mes, pero ta hinca henter mundo den mas problema.
Ora resumi loke ta pasa cu Covid-19, ta increible realisa cu un parti grandi di mundo kier yama su mes civilisa y conoce reglanan cu ta dicidi riba asuntonan manera pasa den luz di trafico.
Ley y Orden ta bira palabranan ridiculo na un mundo, cu kier sigui baila cu morto.
E mundo di progreso tecnico, cu nos kier yama mundo avansa, tin un amor mas grandi pa Covid-19 cu pa mas su mes.
Bisti un tapa boca pa evita cu ta plama of haya e enfermedad cruel, ta wordo considera dictadura di un Gobierno cu mester gasta placa di e pagador di belasting, pa atende cu victimanan cu un grupo di ciudadano, a proposito ta crea pa Covid-19.
Nos mundo a bira asina inteligente, cu nos ta prefera di subi caya, dal den otro, basha otro abou, pa despues tur hende sunchi otro, brasa otro pa duna prueba cu ridicules ta mas bibo cu nunga mescos cu e realidad cu hende ta lobo pa otro hende.
Na October 2021, ya un parti mucho mas grandi di mundo, mester a hala rosea trankil, mientras ya lo tabata posibel pa yuda paisnan cu no tin placa y hende pober na paisnan cu no a conoce desaroyo economico.
Paisnan cu a cuminsa bolbe na normalidad, mester trapa riba brake! Na Hulanda, problema a bolbe cuminsa y hospitalnan ta bolbe avisa pa un realidad amargo.
Hospitalnan rond mundo ta confirma, cu mayoria di hende cu drenta Intensive Care y ta muri, no a vacuna contra Covid-19 mientras e vacuna no a costa sikiera placa.
Mas y mas prueba ta mustra con si hende sobrevivi Covid-19, nan mester presta bon atencion na nan salud pasobra hasta Cancer por ta producto di Covid-19.
Awor kico mas bisa?
E Coronapas, Corona-app, a bira parti di crimen organisa y autoridad mester a actua pa evita cu hende cu no ta vacuna, ta uza e app na forma ilegal pa asina nan, pa medio di mentira, sin vacuna, por pone bida di mas hende na peliger.
Awe e momento a yega pa resumi un asunto cu ta mustra con leu libertinahe a yega na nos mundo, cu a dicidi di bandona inteligencia, concenshi y tur loke ta duna hende e nomber di “hende” cu tin cerebro.
Autoridad no tin nada di bisa. Autoridad mester uza placa di Pueblo, cu ta wordo kita for di boca di hende cu hamber y futuro di muchanan, pa asina un grupo di bobo por sigui baila cu Morto, provoca pa Covid-19.
E amor di e amantenan di Covid-19 ta mas grandi cu e amor pa nan propio bida y nan ta prefera di ta den brasa di Covid-19, cu duna sosten na nan propio bienestar tambe y hasta nan cuminda den futuro.
Tin un posibilidad cu nan no ta interesa den e problemanan pa produccion mundial, pasobra nan ta prefera di muri den brasa di Covid-19.
Rapportnan oficial ta confirma tur dia cu mayoria den Intensive Care y cu ta muri, a nenga di vacuna.
Pero comunidad mester keda keto. Comunidad mester cera boca. Gobierno mester percura pa tin placa pa paga gastonan cu e grupo cu no kier vacuna y ta protesta contra regla, ta produci.
October ta drenta su segundo mitar. 2021 ta yega su fin. Economia ainda ta na peliger rond mundo. Futuro ta scur.
Pero tin un grupo cu un solo ambicion. E grupo di abusadornan di democracia, cu kier sigui baila cu Covid-19 y habri porta di Intensive Care y Santana pa nan mes y tur e inocentenan cu ta sigui regla y ta nenga di bira lobo cu ta mata hende pa mas honor y gloria di un virus cu ta produci Covid-19!
