Bunita reto pa 16 artista cu apertura di “Magnify Mural Expo”

*Tayer di trabao duna pa e artista Armando Goedgedrag

ORANJESTAD (AAN)—E artista plastico Armando Goedgedrag, a duna un tayer di trabao, banda di Big Bazaar Department Store, pa siña e artistanan participante con pa haci “Mural Art” y a tene un exposicion titula: “Magnify Mural Expo”.

Un bunita reto sigur pa e 16 artistanan cu a participa y sigur pa e tereno dinamico y creativo di arte plastico, den e caso aki pintamento, na Aruba.

Esaki ta basa riba e tema di naturaleza, y cada persona por a pinta manera nan a desea, poniendo den practica cada ken su destreza, colorido, imaginacion, y tur recurso cu e pintor tin den su mannan, y mente pa crea. Armando Goedgedrag, den entrevista cortico cu DIARIO a bisa cu cada obra ta encera un mensahe positivo. E ta algo bunita pa Oranjestad unda a duna cada artista un vision unico y por mira esaki riba e muralnan.

Un total di 16 artista a participa den e tayer aki cu a dura cuater siman, y e tabata hopi intensivo, cu hopi presion, pero nan a logra. E muraya ta bay keda asina y lo wak si den futuro lo bin mas, Armando a duna di conoce.