40 aña despues cu a bolter Status Aparte pa crea Status Aruba Hipoteca
*Alarma pa cadena berde di hipoteca, FDSN, Bo Aruba y Avestruz
*Regreso di Mike den su Penthouse den Pandemia ta salto fracasa?
ORANJESTAD(AAN)—Na 2024 den un acto di traicion di partido Raiz, Gobierno Evelyn Wever-Croes cu a cosecha aplauso mundial y sigur den Reino, a pone un fin na Gobierno Evelyn Wever-Croes.
Historia a wordo crea pa e hecho, cu e Ministro encarga cu e cartera di Economia Geoffrey Wever, cu tabata representa e mini partido RAIZ den e segundo Gabinete Evelyn Wever-Croes, a cuminsa mobilisa como miembro di partido FUTURO, naci den e neishi di AVP.
E impresion crea den Pueblo di Aruba dor di Gerlien Croes, tabata cu su base moral no tabata permiti su persona, sostene e forma cu Mike Eman a exigi Pueblo di Aruba acepta convicto Benny Sevinger como representante oficial cu un salario mensual den Parlamento di Aruba.
Su motibo di retiro di AVP a dal un buelta mes grandi cu e totalidad di careteranan entre San Nicolas y Malmok.
Na 2024 un coalicion sorpresa a presenta su mes den Parlamento di Aruba pa pone un fin na Gobierno Evelyn Wever-Croes, directamente despues di e confirmacionnan cu Gobierno Wever-Croes a logra deshaci di e peliger di morto di Florin, cu a wordo causa dor di gobiernonan dirigi pa Mike Eman.
Hunto cu Benny Sevinger den Parlamento, Gerlien Croes tabata parti di e golpe di estado di partido Raiz den Parlamento di Aruba, cu a logra pone fin na Gobierno Evelyn Wever-Croes y a habri porta Geoffrey Wever sigui ehecuta proyectonan como Ministro di Asuntonan Economico pa Raiz den Gobierno Evelyn Wever-Croes mientras e ta co-lider di partido FUTURO di Gerlien Croes, cu mester forma Gobierno nobo pa Aruba hunto cu Mike Eman, dirigente di e partido cu Gerlien Croes a bandona pasobra e no a sinti su mes na cas den AVP.
Mas misterioso den henter e caso aki ta bira e solo hecho cu e mes grupo di Gerlien Croes y Mike Eman, cu a kibra cu otro pero a bolbe cu otro den Parlamento pa deshaci di Gobierno Evelyn Wever-Croes, te awe no por forma un Gobierno pa Aruba cu na 2026 ta mira continuacion di uno di e casonan criminal mas grandi den historia politico di Aruba, cu ta e caso Avestruz, den cual no solamente Benny Sevinger como ex Ministro di Gobierno Mike Eman a wordo manda prison, pero manera den Corte di Husticia a bini oficialmente dilanti, financiadonan importante di AVP, mester a splica Huez un que otro y algun mester bay prison si den Cassatie na Hulanda, e castigo impone pa Corte di Husticia, no wordo considera apropia den revision legal final di e caso.
Orta bolbe den historia, na 1985, e salida di Lago a bira un arma politico pa apertura di un sistema di gobernacion, den cual AVP a pidi Aruba pa “Ban cas back”, pues pa regresa e cas den cual e lucha di Aruba, a wordo traiciona cu 12-8 di Interim Regeling.
AVP a uza e logro di Betico, pa como pais autonomo, uza patrimonio di e Arubiano como base pa otorga hipoteca pa proyectonan cu ciere di Lago a hustifica.
Morto di Betico Croes a deshaci di e unico lider real y inventor di Status Aparte cu tabata Betico Croes y AVP a logra exito dor di hipoteca e placa di e Pueblo di Aruba, cu awe ainda ta mira esaki den e pakete total di debenan di e pais.
AVP a logra cumpra curazon di Aruba cu loke Betico Croes a haci posibel y a ripiti esaki cu proyecto di Mike Eman di 1.6 Biyon di Pueblo di Aruba, cu tambe ta parti di debe nacional.
Pueblo di Aruba a keda cu e debe di proyectonan cu a crea placa pa hopi hende.
Caso Avestruz, naci den seno di AVP, a reparti terenonan di Aruba na amigonan di e partido.
Un resumen ta mustra cu na 1985, e lucha di Betico Croes cu a permiti Aruba su propio maneha di placa, a habri porta pa hipoteca cu a bira logro politico di AVP mescos cu proyecto Fondo Desaroyo Nobo San Nicolas, proyecto Bo Aruba pa no papia di e bolo di terenonan di Caso Avestruz.
Awor, kico tabata e motibo cu Mike Eman kier a bolter maneho di Gobierno Evelyn Wever-Croes, cu a comberti un debe nacional den seguridad financiero pa Aruba?
A base di historia con Mike Eman lo pone Florin lora na 2025 na Aruba a base di su maneho?
E pregunta grandi. Pakico mester a kibra Gobierno na 2024 sin e capacidad pa forma un Gobierno nobo cu e mes grupo cu a base di traicion di RAIZ, a manda Gobierno Evelyn Wever-Croes cas?
RAIZ no ta existi mas pero ainda e ta base di Gobierno y su Ministro lo ta Ministro di Gerlien Croes den e Gobierno nobo dirigi pa Mike Eman, e homber di 1.6 Biyon di Pueblo di Aruba cu durante gobiernonan di AVP, a mira con placa di Aruba, ta lora sin alcansa e cas kibra di un pober Arubiano, cu no por ricibi su amigonan den Penthouse!
Ta dificil pues pa Pueblo haya oportunidad pa dal un betro cu Mike den su Penthouse y puntra pakico nunca el a splica pakico el a retira como lider di AVP na 2017 y unda e tabata, ora Gobierno Wever-Croes a entrega Aruba e futuro nobo, cu awe Mike kier mira den su poder, pa e por entrega Aruba un pakete nobo di miseria y debe!
E bon gobernacion di Mike sin duda ta refleha den e hecho cu el a bolter cos na 2024 pero te awe no por forma un Gobierno. Pakico Gerlien?
