Minister Geofrey Wever, pa loke ta Sector Primario:
- Acceso na awa y electricidad pa agricultornan y e piernan pa e piscadornan
ORANJESTAD (AAN) Minister di Economia, Finanzas y Sector Primario, den entrevista cu DIARIO tocante e proyecto pa instala na Aruba un “Agri Innovation Park”, a duna di conoce cu e deseo di nos agriculturnan mas tradicional ta pa nan haya apoyo y no e industria nobo.
E dignatario ta mira agricultura for di diferente pilar: pesca, plantacion unda tin hende cu ta produci berdura y otronan ta planta fruta, y den e innovation park, tin e sector “NUTRIA”.
Anto cada un tin necesidadnan diferente, cada un tin peticionnan diferente. Anto e maneho cu nan a delinea pa e mandatario ta un approach pragmatico. “Mi a bisa nan pa no expect cu e por pone un documento, un vision, un papel atrobe pero e kier resolve nan problemanan concreto. Pesey nos ta trahando riba e problema di electricidad.
Tur esnan cu ta den produccion tin problema cu electricidad; nos ta ocupa cu NV Elmar pa yega na un solucion integral pa full e sector pa e parti di coriente. Nos a cuminza papia cu e piscadornan y nan ta bisa nos pa wak e infrastructura; e piernan no ta den bon estado, nos a cuminza aloca 500 mil Florin pa drecha e piernan, esun di Savaneta ya ta den proceso, y nos ta den proceso cu esun di Colony pa despues continua cu e otro piernan pa nos piscadornan tin nan infrastructura.
Pa criadornan di bestia comparti cu otro, por ehemplo, carni fresco, carni nobo ta un must. Eynan nos a compromete nos mes cu nos ta percura pa 2026 importacion di carni fresco, pa e mezcla por tuma lugar na un forma corecto. Ta cosnan cu pa hopi tempo no a haya atencion y cu nos ta bay, aworaki, percura pa tuma lugar, mescos cu e problema di haya acceso na awa continuo”, Minister Geoffrey Wever a señala.
E dignatario a asegura cu esaki ta algo cu el a compromete pa resolve den corto tempo. E idea ta pa bay den henter e sector, resolve e problemanan concreto cu nan tin y yuda esnan cu ta bon ocupa caba pa expande.
