Buki di e famoso Willem Rasmijn kende a haya oro den Rooi Fluit

Autor Edgar Ras lo lanza e buki otro siman

ORANJESTAD (AAN): Diahuebs venidero, esta 17 di September 2026, lo tin na Biblioteca Nacional e lanzamento oficial di e buki “Willem Rasmijn: Storia di su bida y di e keintura di oro Arubano.”

   E ta un obra di e autor Edgar L. Ras, y lo ser presenta for di 6:30 pm te cu 9:00 pm na Biblioteca Nacional na Madurostraat na Playa.  Esaki lo ta combina cu un programa Literario-Cultural.  Tur esaki den cooperacion cu Astrid Britten (Biblioteca Nacional Aruba), Siegfried Dumfries, (Departamento di Cultura Aruba) y Mirto Lacle (Linguista, Literato y Gestor Cultural).  Asina lo tin un programa multifacetico cu presentacion di un obra historico-literario nobo.

   Tambe lo tin charla, documental, musica y canto.  Grupo di Tambu y Grupo Tipico musical lo t’ey pa deleita publico.

   Edgar Ras, e autor, lo tin e honor di presenta un buki cu el a skirbi como homenahe na pasado di Aruba, unda historia y ficcion ta topa cu otro.  Titulo di e buki ta “Willem Rasmijn”, Storia di su bida y di e keintura di oro Arubano.
   Den e tera seco di Aruba, un hoben yama Willem Rasmijn a topa cu algo cu a cambia historia di Aruba pa semper. Pero e balor di su descubrimento no tabata solamente den oro, sino den e memoria di un pueblo, den e silencio di e mondi, y den e pasonan di generacionnan cu a keda atras.

   E buki aki ta un homenahe na Willem Rasmijn pa duna bida y bos na un nomber cu nos no mester lubida. Cu respet, emocion y identidad, e buki aki ta hiba e lesado den un relato tocante descubrimento, lucha, dignidad y herencia.

   “Mi a haya mas cu oro, pero no ta tur cos mester a wordo descubri”.  “E silencio ta papia cu esun cu kier scucha.  E piedra cu Willem a haya den Rooi Fluit, tabata bal mas cu oro”.  “Willem ta di nos”.
   Encuanto e autor: Edgar Ras a labora activamente pa 42 aña den Cuerpo Policial Aruba. Na Scol pa Polis el a ocupa funcion di docente/instructor. Tambe el a funciona como desaroyado di material, tanto pa enseñansa policial, como pa instancianan gubernamental y ultimamente pa sector priva.

   Su funcion principal, desde 2015, tabata Coordinador di Curso y Entrenamento y durante su ultimo 2 añanan di servicio activo, e tabata na cabes di Scol pa Polis como suplente.

   E buki lo ta obtenibel durante e anochi aki, y corda cu entrada ta gratis. Bin celebra herencia y identidad di Aruba.