President di Camara di Comercio di St. Maarten, Tamara Leonard:
ORANJESTAD (AAN): Dependencia fuerte riba turismo y importacion ta sigui representa un reto pa economia di diferente isla den Caribe Hulandes. President di Camara di Comercio di St. Maarten, Tamara Leonard, ta argumenta cu ta necesario crea mas oportunidad pa empresarionan local expande, exporta y genera entrada pafor di nan propio mercado.
Durante un bishita na Aruba, Leonard a presenta un Trade Mission na Miami, programa pa 16 te cu 19 di november 2026, cu tin como meta facilita acceso di empresarionan di Caribe Hulandes na mercado Americano.
Segun Leonard, durante hopi aña nos islanan a importa un gran cantidad di mercancia for di Merca. E iniciativa aki ta busca cambia parti di e dinamica ey door di facilita pa empresarionan local tambe por exporta nan producto y haci negoshi directamente cu companianan na Merca.
Leonard a enfatisa cu diversificacion economico ta specialmente importante pa economianan cu ta depende fuertemente di turismo. Durante temporada cu actividad turistico ta baha, empleo y entrada di famianan por wordo afecta, mientras gasto y obligacion financiero ta sigui mescos.
Pa e motibo aki, segun e Leonard, ta necesario crea mas manera pa empresarionan y famianan genera entrada durante henter aña.
E Trade Mission ta inclui informacion y guia practico tocante establecimiento di negoshi, contacto comercial, importacion, exportacion y distribucion. Leonard tambe a menciona oportunidadnan liga na Foreign Trade Zones, unda mercancia por wordo almacena y distribui bou di condicionnan specifico.
Otro beneficio menciona ta acceso na red internacional di Greater Miami Chamber of Commerce, cu por conecta empresarionan di Aruba y otro islanan cu potencial socio comercial, distribuidor y mercado nobo.
Leonard a señala cu oportunidadnan asina ya ta existi, pero cu hopi empresario micro y chikito no semper tin e informacion, contacto of acceso necesario pa haci uzo di nan. Pa e motibo aki, e Trade Mission ta enfoca no solamente riba informa, sino riba habri acceso y crea conexionnan concreto cu por yuda empresanan local crece internacionalmente.
Aruba ta entre e islanan cu ta wordo invita pa participa den e iniciativa, cu e meta pa fortalece cooperacion regional y crea mas oportunidad pa producto y servicio local drenta mercado internacional.
