Bucuti & Tara ta celebra logro historico como e di 5 miho hotel di mundo y No. 1 den Caribe riba Tripadvisor

ORANJESTAD (AAN):   Bucuti & Tara Beach Resort, Aruba a celebra su ekipo extraordinario di profesionalnan den hospitalidad,

cu a contribui na e resort su logro historico como e No. 5 Miho Hotel di Mundo y No. 1 Miho Hotel den Caribe den e Tripadvisor Travelers’ Choice Best of the Best Awards 2025.

            Durante un celebracion emocionante, Prome Minister, Sr. mr. Mike Eman, Minister di Turismo, Transport y Labor, Sr. mr. Wendrick Cecilia, Presidente di Comision Fiho di Turismo di Parlamento, Sra. Jennifer Arends-Reyes, CEO di Autoridad di Turismo Aruba (A.T.A.), Sra. Ronella Croes, a uni cu e ekipo di liderato di e resort pa honra e profesionalnan apasiona pa nan logro historico cu ta sigui pone Aruba riba escenario  mundial.

Lidernan di Aruba ta Felicita Bucuti & Tara pa Eleva Turismo di e Isla

            E logro historico ta refleha un crecemento impresionante for di No. 21 den 2024 pa Top 5 mundialmente den 2025 — un prestacion logra door di menos di 0.001% di mas cu 1.6 miyon hotel menciona riba Tripadvisor. Bucuti & Tara tambe a alcansa e titulo di Hotel No. 1 den Caribe, a sigui su liderato como Hotel No. 1 di Aruba, y a keda clasifica como No. 2 Miho Hotel di Mundo pa e categoria di “Treat Yourself”, tur basa riba reseñanan autentico di e huespednan.

            E asociadonan di Bucuti a celebra cu muziek, snacks y bebida y e team a sinti un gran honor pa ricibi palabra di gradicimento y motivacion di parti di e Prome Minister y e Ministro di Turismo, Transport y Labor kende a elogia nan como e mihor ehempel di hospitalidad autentico di Aruba, y a felicita Bucuti & Tara como un negoshi cu ta lidera cu proposito. Nan a pone enfasis riba e compromiso profundo di e resort pa sigui reinverti den su comunidad y medioambiente, algo cu no hopi biaha ta wordo mira na e scala aki. Como un ehempel poderoso, nan a reconoce e creacion di e Bucuti Tara – GMC Nature Preserve di 130.000 m² na Noord, funda door di Ewald Biemans, doño di e resort, cu e meta pa restaura flora y fauna nativo y preserva e herencia natural di Aruba pa futuro generacion.

            “Masha danki, di curason,” Crescenzia Biemans, Chief Corporate Officer di Bucuti & Tara Beach Resort a comparti. “Cu un resort local y independiente a wordo nombra como No. 5 di mundo ta un logro extraordinario; e ta un logro cu ta pertenece na tur miembro di nos ekipo di Bucuti y na henter comunidad. Ta boso hospitalidad, boso orguyo, y boso dedicacion cu e huespednan mundial ta keda recorda. E reconocemento aki ta prueba cu ora bo maneha un compania cu proposito, pasion, y consistencia, bo por marca historia. Nos ta sigui cu nos compromiso pa inverti den nos hendenan, nos comunidad, nos medioambiente y nos futuro, pa nos por sigui pone Aruba riba escenario mundial cu orguyo, hunto.”

            Como un reconocimento di e compromiso firme di nos ekipo su excelencia durante e aña di servicio 2024, Bucuti & Tara Beach Resort a otorga un bonus di 3.000 florin na cada empleado, sin excepcion di posicion of departamento. E gesto aki ta un manera pa celebra y gradici tur asociado pa nan esfuerzo colectivo pa ofrece un experiencia excepcional na nos huespednan, loke a contribui directamente na e reconocemento mundial cu nos a ricibi recientemente.

            Como e prome y unico hotel certifica carbon-neutral den Caribe, Bucuti & Tara ta sigui pone e standard pa servicio excelente y luho responsabel. Cu ofertanan eleva den bienestar, un concepto nobo di gastronomia farm-to-future, y experiencia romantico personalisa, e empleadonan di Bucuti ta e pilar di su exito. For di housekeeping te concierge, e ekipo culinario te na e team di seguridad, tur rol ta esencial.

            Huespednan for di tur parti di mundo ta describi nan experiencia na Bucuti & Tara como “calmante pa e alma,” un experiencia cu ta “cambia bo bida,” y ta “profundamente personal.” Huespednan mes a comparti: “Nan a pone e standard asina halto cu ta berdaderamente dificil pa nos desea biaha of keda otro caminda.” E reconocementonan di Tripadvisor ta basa exclusivamente riba experiencia directo di huesped, loke ta haci esaki e premiacion mas autentico y aprecia den industria di biahe mundial.

            Cu gratitud, orguyo y un curason yen di alegria, e ekipo di Bucuti & Tara ta mira padilanti pa sigui nan caminda di excelencia.