Dentista drs. Hendrik Marsman cu fuerte declaracion:
ORANJESTAD (AAN) – Den un entrevista cu DIARIO, e dentista drs. Hendrik Marsman a duna un fuerte declaracion contra e practica di e universidad estableci na Aruba, esta, “Nucleus University School of Medicine & Dentistry”, situa na Wilhelminastraat, cu segun e dentista ta haci cosnan ilegal na Aruba.
Marsman a expresa cu e Instituto aki ta un neishi di problema; e ta un supuesto opleiding di dentista. E mes tin estudio di dentista, na un universidad di Hulanda y e sa kico ta un opleiding di Dentista, y loke e Instituto menciona tin ta un diploma sin balor.
El a señala cu tin dentista ta traha eynan cu ta bin di India, y nan a haya permiso di DIMAS pa traha como profesor, pa duna les, pero nan ta traha den boca den pashent. Marsman a subraya cu nan a aplica pa AruBig, pero esaki a wordo nenga pasobra cu e diploma cu nan tin, nan no por traha na Aruba, y tin un di tres na caminda, pa bin traha akinan.
“Nan a trata un pashent tambe eynan, nan a cobr’e, anto a sali un email anonimo pa Instituto di Calidad, y nan a bishita nan y bisa cu nan no por traha den boca di pashent”, Marsman a duna di conoce.
Marsman a sigui bisa cu nan a stop e practica aki, pero “parce” na Januari ultimo nan a contrata un negociante Arubiano, cu ta emplea dentista. “El a emplea un dentista di Colombia cu ta huur un parti di Universidad pa trata pashent. Y loke ta preocupante ta cu Inspeccion di Salud ta exigi secrecia di pashent, datonan di dossier, y ami a compronde cu e rumornan ta cu e cuatro miembronan di e fundacion cu ta den borg, tin acceso na e pashent pa wak kico ta wordo haci y kico ta wordo paga, pasobra nan ta cobra comision p’esey, pasobra nan ta duna e inversionista Arubano ey, e lugar pa traha, pa wak pashent”, dentista Marsman a señala.
Marsman a relata cu tur dia 15 di cada luna e tin cu paga su omzet belasting, AOV, etc., manera tur hende na Aruba. “Nos ta keha hopi, nos tin cu pag’e, pero eynan ta un free for all. Bo ta haya bo cu profesornan ta bin traha na Aruba, nan no tin cuenta di banco, nan ta wordo paga cash. Despues di 12 luna nan ta bay, anto mi ta puntra con ta haya e placa cash ey? Con e cos ey ta bay cu banco?”
Marsman kier pa DIMP bay check kico ta kico cu AZV, SVb, pasobra e dentistanan local si tin cu paga nan parti.
Nota di Redaccion: DIARIO a tuma contacto cu Nucleus, cu a informa cu nan ta bay trece nan version dilanti, pa contraresta e declaracion di Dr. Marsman.
