ORANJESTAD (AAN): Recientemente DIARIO a tuma nota, cu Bucuti & Tara Beach Resort a cuminsa un transformacion dinamico di su facilidadnan di dining,
cu renobacionnan tanto den su interior como exterior, hunto cu un menu nobo cu ta enfoca riba sostenibilidad, pa activa e sensacionnan y mehora e experiencia di huesped.
Renobacion lo wordo haci for di 15 di October te cu 15 di December 2024. Asina Elements Restaurant, y Tara Lounge ta den proceso di renobacion cu colaboracion cu e firma di arquitectura interior FG Stijl, cu ta basa na Hulanda. Conoci pa crea interior di luho pa boutique hotelnan rond mundo, e fundador di FG Stijl, Colin Finnegan, ta trece su mescla unico di elegancia y funcionalidad na Bucuti & Tara. Cada detaye ta cuidadosamente diseña, incorporando mueblenan personalisa, sostenibel y trabaonan artisana pa crea espacionan cu ta sinti tanto unico y eterno.
Compania local di construccion y trahadornan di Aruba ta envolvi den e proyecto di renobacion. E diseño nobo ta cu Tara Lounge lo wordo decora cu un tono di blanco suave, crema, y tononan di palo scur, lo tin un dak halto cu lo permiti solo drenta. Stulnan cu cusinchi suave ta invita huespednan pa relaha y keda mas comodo.
Elements Restaurant lo ofrece un buffet cu live-cooking nobo cu ta pone e huespednan den e curason di e experencia culinario. E restaurant lo worde redefini cu un skema di color refina incluyendo colornan bruin, neutralnan suave y tokenan delicado di color vibrante, mehora door di iluminacion sutil y cu ta crea un ambiente trankil y romantico. Huespednan por disfruta di un mescla di sofa y stulnan, situa riba e tereno di e restaurant cu bista riba e obra di arte di e resort - e pida lama iconico di Eagle Beach cu su santo blanco y awa blauw.
