ORANJESTAD (AAN): Ewald Biemans, Doño di Bucuti & Tara Beach Resort a worde invita door di Organisacion Nacionnan Uni (ONU) pa participa den nan Conferencia di Clima conoci como COP28.
Biemans a worde pidi pa comparti e programa ambiental di Bucuti & Tara, cual ta e prome y e unico hotel certifica Carbon Neutral den Caribe y e hotel cu mas eco-certificacion na mundo, y con esaki ta complimenta e metanan di sostenibilidad di Aruba mes. E evento anual lo worde teni na Dubay e aña aki for di 30 di November te cu 12 di December, 2023.
E invitacion aki a yega despues di un webinar reciente y cautivante unda cu e Nacionnan Uni a presenta e exito di Bucuti & Tara. Como e prome hotel na mundo cu a gana un Global United Nations Climate Action Award, Biemans a worde invita pa representa Bucuti & Tara na COP26 dos aña pasa como e unico resort independiente cu a firma e Declaracion di Glasgow pa Accion Climatico den Turismo. Nacionnan Uni a extende e invitacion pa COP28 e aña aki na Biemans como un catalisador di cambio, kende lo tambe lo ta compartiendo con e resort ta actualisando su programa ambiental pa logra su proximo meta, cual ta certificacion Net Zero y ta animando otronan pa uni den e causa urgente.
Conferencia COP28: Lidernan mundial y representantenan di gobierno, cientificonan, activistanan y ehecutivonan, incluyendo Biemans, lo reuni pa examina e progreso di e Acuerdo di Paris di UNFCCC, un trato internacional riba cambio climatico. E delegacionnan di tur 199 partidonan di e Convencion di Cuadro di ONU riba Cambio Climatico lo atende e conferencia. COP28 UAE lo ta un momento di hito unda cada nacion lo evalua nan progreso riba e Acuerdo di Paris. E acuerdo critico a mobilisa mundo pa tuma accion pa limita e aumento di temperatura global na 1.5C riba nivelnan pre-industrial pa 2100, cu e acuerdo birando legalmente obligatorio rekeriendo cu e emisionnan actual ta alcansa su punto mas halto prome cu 2025 y baha cu 43% pa 2030.
Discusionnan na COP28 lo concentra riba aceleracion di cambio pa fuentenan di energia limpi enbes di fuentenan halto den carbon, azeta y gas. Asistencia pa e evento a crece enormemente y ta spera di tin 70,000 asistentes, facilmente superando e 45,000 na e COP27 di aña pasa.
Hotel chikito riba un isla chikito ta establece precedente global: Biemans ta presente na COP28 di 10 te cu 11 di December, 2023. E lo ta reuniendo cu participantenan na e stand di e Declaracion di Glasgow. Biemans lo anima organizacionnan den e sector di biahe pa firma e Declaracion di Glasgow y lo yuda nan cuminsa nan trayecto di sostenibilidad of duna conseho pa yudanan supera obstaculonan.
Pa decadanan caba Biemans a realisa cu mientras Aruba y e resto di Caribe, ta contribui minimamente na emisionnan global, nos ta encontra nos mes den un situacion critico, cu necesidad pa combati cambio climatico urgentemente. E mesun costanan cu ta atrae biaheronan buscando un vakantie den solo, ta criticamente vulnerabel na subida di nivel di lama y perdida di bida marino y naturaleza. Si mundo no por reversa calentamento global, den apenas 20 - 30 aña, tur nos hotelnan lo ta bou awa.
Cu 104 camber, e hotel reconoci como e No. 18 Mihor Hotel na Mundo y No. 1 den Caribe riba Tripadvisor, ta ser reconoci continuamente pa su business model agil y orienta pa medio ambiente. COP28 ta enfoca riba catalisadornan pa cambio y ta inclui Bucuti & Tara como un ehempel real. E resort a bira e prome, y ta keda e unico hotel pa gana un Global United Nations Climate Action Award na 2020. Despues di gana, ONU a menciona cu e programa di sostenibilidad di Bucuti & Tara tabata "altamente replicabel y escalabel" y a pidi hotelnan mundialmente pa sigui e ehempel di Bucuti.
Mas recientemente, Biemans tabata un invitado special den e serie di webinar di Organizacion Mundial di Turismo di Nacionnan Uni yama “In Conversation With”. Durante e entrevista Biemans a comparti e experiencianan, retonan y oportunidadnan di e resort di den desaroya y implementa su plan di accion climatico. Esaki a complementa e estudio di One Planet Network yama Con Certificacion a Guia Accion Climatico di Bucuti & Tara.
“Ser invita pa participa na e COP28 di Nacionnan Uni ta un honor masha grandi y mi ta felis di por comparti cu mundo cu Aruba ta cas di Bucuti & Tara Beach Resort y ta comprometi na mantene nos planeta y comunidad saludabel y resiliente. Nos lo continua cu nos meta di reduci emisionnan na mitar pa 2030 mientras nos ta sigui implementa mas energia renovabel," Ewald Biemans a declara.
