Bubali Plas a yega su capacidad di por carga awa y esaki ta afectando e bario di San Miguel

Efecto di e yobidanan excesivo:

 Varios instancia ta trahando pa mitiga e impacto 

ORANJESTAD (AAN):  Bureau Rampenbestrijding Aruba conhuntamente cu DOW, Directie Volksgezondheid DVG ARUBA y Parke Nacional Arikok a wordo alerta di e yobidanan excesivo ultimamente.

            Consecuencia di esaki, Bubali Plas a yega su capacidad di por carga awa y esaki ta afectando e bario di San Miguel, caminda e casnan den vecindario por yena cu awa extremadamente.

            BRA, DOW, DVG, y FPNA a prepara un plan pa mitiga e impacto riba hende y naturalesa mesora. Pa e motibo aki, diabierna anochi, DOW y Korps Politie Aruba a cera e caminda entre ex-House of Cheng y Courtyard by Marriott, caminda a pone un pomp  pa pomp awa for di Bubali Plas pa bay den Salina di Palm Beach como un solucion inmediato y evita cu mester habri e sluis cu lo dirigi e awa pa laman.

            E pomp a opera 24 ora te cu diasabra y a manda mas o menos 17.000 m3 di awa. Na e momentonan aki, e cantidad di awa cu ta wordo manda no ta suficiente.

            Priorizando e salud y seguridad di e bario di San Miguel, a dicidi pa temporalmente habri e sluis pa por baha e exceso di awa mas liher y asina garantiza e seguridad di tanto hende como naturaleza. A dicidi cu ta bay habri e sluis entre 2 y 3 cm enbes di 15 cm entre e oranan di 10:00 pm y 3:00 am pe proximo 8 dianan. 

            Esaki ta sigura cu solamente e parti ariba di e awa den Bubali Plas lo "sali" pa laman.

E raiz di e waterhyacinths cu ta den e plas ta wanta e particulanan los y pa es motibo e cantidad di e concentracion di e awa den Bubali Plas a mengua y a wordo debilita.

            DVG ta encarga pa monitorea e awa tur dia, pa asina sigura cu no tin ningun cambio den e calidad di awa cu ta drenta laman.

            Bao di e circumstancianan aki tur partidonan envolvi kier sigura comunidad di Aruba cu e medida aki ta e unico solucion pragmatico pa preveni inundacion di e bario y garantiza e salud di e publico.

Gobierno y tur instancianan concerni ta trahando conhuntamente pa un solucion structural den corto- y medio plazo pa por garantiza cu e situacion aki no ta ripiti .

            Den e proximo siman ahustenan tecnico lo tuma lugar pa optimaliza e fluho di awa pa Salina Druif.              Solucion riba medio plazo ta encera implementacion di un planta moderno, cu lo trata e awa residual conforme protocol di LBS.

            Tambe lo conecta "Westland Wetlands" cu lo duna aporte na e maneho di e masterplan pa maneha e awa di yobida na un nivel mas halto y incorpora plannan di mitigacion pa cambio climatico. Potretnan cortesia di Facebook di DOW.