Jurette Croes di DVG:
ORANJESTAD (AAN): Jurette Croes, Communicatie Adviseur na Departamento di Salud a duna di conoce cu e siman aki ta sigui cu e campaña di vacunacion pa loke ta e 'boostershot' di e vacuna Bivalent contra Covid.Croes a laga sa cu e yamado ta na comunidad pa e siman aki acudi na e distrito di Noord di 8:30 am te cu 3:00 pm non stop na Centro Deportivo Frans Figarora. Tambe por pasa na Departamento di Salud Publico na Playa di 8 am te cu 11:45 am y di 1 pm pa 3:35 pm.
E siman aki por acudi na cualkier di e dos prikpost aki, sea den bario di Noord of na Departamento di Salud Publico. Den paginanan anterior di DIARIO awe, den un otro articulo por mira mas di e schedule di vacunacion pa loke ya e resto di e luna aki unda lo ta na Santa Cruz y na San Nicolas, Jurette Croes a indica.
Manera ta conoci, recientemente European Medicines Agency (EMA) a duna conseho positivo pa aprobacion di e vacunanan di Pfizer cu ta adapta pa ‘target’ diferente subvariante di e variante Omicron como tambe e variante original di COVID19 pa ciudadanonan di 12+.
Aruba a ricibi un cantidad di e vacuna bivalent aki pa combati e variante cu ta circulando den comunidad mihor. E vacuna adapta aki a prueba caba di ta hopi efectivo den provoca un respondi inmunologico fuerte y lo bay worde uza como boostershots pa tur 12+ y como ripiticion di e serie di vacuna pa tur 60+.
