Lance Henriquez lo trata e tema “btw” durante seminario “Are you ready for 2022?”
ORANJESTAD (AAN) – Lance Henriquez, Tax Manager na Grant Thornton, a hiba palabra den conferencia di prensa, tocante e seminario “Are you ready for 2022”, cu e institucion aki ta bay brinda otro siman, Diaranzon 8 di December.
El a duna di conoce cu durante e seminario, su tema lo ta “BTW”, ya cu un di e temanan mas actual aki na Aruba, ta e decision di gobierno pa bin cu un BTW na aña 2023.
“Dus, nos ta kere cu ta toch importante pa bay para keto na esaki y duna un splicacion en general, di con e sistema di BTW ta traha.
BTW ta un belasting cu, eigenlijk, ta basta conoci mundialmente; mayoria pais na mundo tin un forma di btw caba implementa den nan sistema di belasting, pero pa Aruba toch esaki ta bay ta un belasting nobo y e intencion ta pa e bay substitui e BBO cu nos tin actualmente. Pues, nos ta bay para keto den e presentacion di e aspectonan general di e btw, con esaki ta diferencia su mes di e bbo cu nos tin actualmente”, Henriquez a declara.
E lo splica tambe con e btw ta funciona den practica, ki efecto esaki ta bay tin pa e comerciantenan, kico lo ta e diferencia compara cu BBO, y nan ta bay para keto na algun di e cambionan cu gobierno a anuncia anteriormente caba, den nan di dos fase di “Belasting Hervorming” cu tabata den plan di wordo introduci, poco prome cu e pandemia a cuminza, y pa motibo di esaki a wordo poni on hold. “Nos ta kere toch, cu hunto cu e btw lo introduci e cambionan aki, atrobe y cu ta bon pa para keto un biaha mas, na e cambionan cu a wordo introduci anteriormente, y pasa over di nan atrobe”, Henriquez a señala.
El a agrega cu na Grant nan ta kere cu BTW ta un sistema mas actual y facil pa implementa compara cu BBO, y cu BTW ta un bon escogencia pa substitui BBO.
