ORANJESTAD (AAN) — Diamars durante un reunion publico, mr. Ady Thijsen a dispidi den Parlamento, como Parlamentario y Presidente di Staten te cu ultimo eleccion, den cual a scoge mr. Edgard Vrolijk como e actual Presidente di Staten.
Dirigiendo su mes na Presidente di Parlamento, Edgard Vrolijk, mr. Thijsen a expresa cu pa su persona tabata un honor y privilegio di a representa e pueblo di Aruba, pa hopi aña.
El a menciona cu ora un politico ta pone su mes riba lista pa representa su pueblo, e no sa si ta wordo elegi ni si e ta drenta gobierno of parlamento, pero ta pueblo ta dicidi. Asina el a drenta no cu e pensamento cu e lo keda asina largo, pasobra e ta di profesion Abogado, cu ta tambe un profesion hopi responsable y un bunita carera. E mester a scoge y el a scoge pa representa e pueblo di Aruba.
Thijsen a subraya cu tur cos cu un hende kier ta den bida, ta encera un sacrificio cune y ta representante di pueblo ta hopi sacrificio mester haci: sacrificio grandi personal, sacrificio grandi pa e famia, y hopi biaha tin cu siña acepta insulto y menazanan y esey ta cosnan cu mester siña biba cune, pero no mester laga nada stroba pasobra un hende cu ta keda humilde, keda su mes y cana e caminda corecto no mester tin miedo di nada. El a subraya cu e bida como politico no ta facil.
Thijsen a pidi su coleganan parlamentario pa semper keda humilde, responsable, y haci nan best pasobra nan no sa cuanto tempo nan ta bay keda den nan funcion aki.
El a trece dilanti palabranan expresa pa e politico Mericano Robert Kennedy, ken a wordo asesina y cu ta bisa asina aki: “The purpose of life is to contribute in some way to making things better.”
“Ami ta kere den esey tambe. Kere den purba di contribui pa haci e bida miho pa nos hendenan. Anto, mi ta kere cu como parlamentario bo por hacie pasobra bo tin e sosten di e pueblo y e posibilidad tambe di hacie conhuntamente.
Seguidamente, mr. Thijsen a gradici tur su coleganan cu kendenan el a traha desde 2005, muy particularmente esnan di fraccion di MEP, unda el a cuminza como lider, despues ocho aña den funcion como parlamentario, y pa ultimo, cuater aña como Presidente di Staten.
El a gradici tambe tur parlamentario di otro partidonan, cu tambe el a traha cu nan, cu por tabata tin diferencia di opinion, pero semper cu respet pa otro, cu ta e parti di democracia. No a keda sin gradici e personal di Staten cu a bira manera parti di su famia, vooral trahando tanto aña hunto, y tambe a expresa su gratitud pa e griffier, señor Herman Hek, cu ken e tin e placer di a labora hopi di cerca dje, no solamente localmente, pero tambe pafo di Aruba y cu como Arubiano, hopi biaha a Sali na vanguardia di e pueblo di Aruba. Tambe el a gradici Partido MEP cu a dune confianza, respet, y e sosten cu semper el a haya di su partido. Tambe a mustra su gratitud di curazon pa tur hende cu a dune sosten den su carera politico.
