Bruno “Brenchie” Arends y Angel Botta honra na Plaza Comercio

Minister Geoffrey Wever:

ORANJESTAD (AAN): Diamars ultimo den precencia di S.E. Gobernador Alfonso Boekhoudt, coleganan minister y parlamentarionan, famianan y demas conocidonan di e honradonan, Minister Geoffrey Wever a tene un acto ceremonial unda a desvela oficialmente e plaza nobo na e crusada di Wilhelminastraat y Columbusstraat.

            A pesar di enfrenta desafionan infrastructural inespera, a logra finalisa exitosamente Fase 1 di e plan di revitalisacion, cu segun Minister Wever, "ta promete un futuro briyante pa Wilhelminastraat y su area cercano". A indica cu pronto lo inicia cu Fase 2 cu lo expande riba mehoracionnan na iluminacion, parkeo y accesibilidad den e area.

            Parti di vision di Minister Wever ta pa revitalisa e centro di ciudad y injecta bida nobo den e nucleo di Oranjestad. Gobierno tin e rol pa facilita comercio, pa apoya e comerciantenan cu curashi y nan metenan comercial pa asina segura cu nan tin un fundeshi solido pa prospera. "Mester diversifica y enrikece e experiencia di tur cu ta bishita e centro di ciudad", segun e mandatario. Plaza Comercio ta contribui asina na e ambicion pa posiciona Oranjestad como e Capital Culinario di Caribe.

            Despues di un proceso di nombracion, dos nomber a destaca. Mirando cu tur dos nominado tabata digno di reconocemento, conseho di minister a bai di acuerdo pa reconoce tur dos persona pa nan aporte na desaroyo di nos centro di ciudad, nombrando e plaza nobo Plaza Comercio. A brinda un homenahe na e dos personanan aki, esta Sr. Bruno Justiniano “Brenchie” Arends, y Sr. Angel Botta, kende nan contribuicionnan a yuda forma e identidad cultural y comercial di Oranjestad.

            Minister Wever a gradici tur esnan cu a contrubui pa por a realisa Fase 1, incluyendo ing. Raffy Kock pa su diseño arkitectonico di e proyecto, como tambe na Sr. Carlos Profet di Inarch, Xena Profet di Profecy Collective, y Metabolic Foundation pa nan contribuicionnan valioso tras di e proyecto.

            E inauguracion di Plaza Comercio no ta solamente un logro fisico, pero un simbolo di e aspiracion colectivo pa revitalisa y reimagina e centro di ciudad como un luga di comercio, cultura, y comunidad. "Mi ta convenci cu e inversionan haci lo conduci na mas confiansa y inversion priva den Oranjestad" - Geoffrey Wever.