Borchi grandi di ‘No Tira Sushi’ pero toch ta sigui benta tur cos eyden

ORANJESTAD (AAN): Mira aki!  Asina un borchi grandi di “No Tira Sushi” a wordo poni na e Dam di Moko. 

Sinembargo ta un berguenza pa mira cuanto sushi tin tira eyden.  Riba e potret aki por mira djis un solo banda.  Mas pariba, tin masha hopi sushi mes benta.

   E Dam di Moko ta cubri un area di como 40 mil meter cuadra, y ta hopi decada caba a keda concientiza hende cu esey no ta un lugar dedica pa ricibi sushi. 

   Pero atravez di hopi aña por mira hende ta benta sushi conoci como grofvuil, pero tambe sushi cu ta contene quimica peligroso, manera bateria (cu ta contene mercurio), y tambe bateria di auto y demas material flamable.

   Den pasado a yega di capta potret di Trucknan Septico cu ta djis yega, habri cranchi y laga tur nan contenido basha eyden.

   Ora a kere cu den 2021 kizas ciudadanonan lo a bira mas sabi y conciente, ta parce cu e ta tumando un birada pa lo peor.  Algo tin di wordo haci pronto si na esaki.  Ohala Partidonan den campaña lo por dedica algo di esaki den nan programa di gobernacion.