ORANJESTAD (AAN) – Manera ta conoci e Organizacion di Nacionnan Uni (ONU), cada bez ta pone mas enfasis riba e temanan di sostenibilidad di nos Planeta Tera
y den transcurso di tempo a decreta diferente fecha pa destaca diferente di e aspectonan cu ta regarda e naturaleza y su proteccion.
Precisamente, ONU a decreta Dia 22 di Mei como Dia Internacional di e Diversidad Biologico, cu e meta di crea consenshi tocante e importancia cu e biodiversidad tin pa e sernan humano, y obviamente e necesidad di cuide y preserve pa e generacionnan futuro.
Diversidad Biologico ta encera tur e sernan bibo cu ta existi na mundo, y e diferencianan genetico di cada especie, tanto di animal como planta y micro-organismonan cu ta nace, crece y desaroya den un eco-sistema determina. Esaki ta inclui e diferente proceso y cambionan evolutivo cu ta sosode cu e especienan y nan habitat.
Algo hopi bunita pa tene na cuenta e diversidad biologico cu nos tin den nos Parke Nacional Arikok su flora y su fauna diverso, cu den varios oportunidad ta inspira mucha y hobennan di scol, pa traha proyectonan riba dje; lastima cu a keda den un pause largo debi na e pandemia.
E termino “Diversidad Biologico” a wordo estableci na aña 1985 durante e foro internacional di diversidad biologico na Merca. Y na 1992 a wordo firma e Convenio riba e Diversidad Biologico, durante e “Cumbre pa e Tera” dirigi door di e Organizacion di Nacionnan Uni (ONU). E Convenio aki a wordo aproba p 196 pais, cu a compromete na aplica e acuerdonan den su diferente sectornan.
E valioso instrument internacional aki tin como meta proteha, cuida y conserva e diversidad biologico den henter e Planeta, cu e intencion pa concientiza e especie humano pa bira capaz di biba den un mundo hopi mas sostenible, cu mas husticia y igualdad, unda e distribucion di e recursonan natural por yega na un mayor cantidad di hende cu, lamentablemente, awendia ta sufri di hamber, miseria y morto pa falta di e recursonan aki.
“Mi ta parti di e Solucion” ta e lema pa e aña 2021 aki, cu e finalidad di continua cu e obhetivonan di e campaña 2020: “Nos solucionnan ta den e naturaleza”.
Dentro di e metanan riba Agenda pa e Desaroyo Sostenible 2030, ta wordo contempla enfrenta un di e desafionan mas grandi cu e hende moderno tin su dilanti, cual ta mehora e bienestar y condicionnan di bida pa tur e sernan humano. Akinan e biodiversidad ta hunta un papel vital, pasobra di dje ta depende e desaroyo di e actividadnan economico, social y cultural cu por permiti pa cubri tur e necesidadnan basico di subsistencia.
