ORANJESTAD(AAN)—“E investigacion cu mester tuma luga ta, si na cualkier momento na un forma of otro, arma a bini dilanti.
Probablemente no tabata tin un keho directo haci na Ministerio Publico cu e no a drenta den accion, aunke si por cuestiona con por ta posibel cu tur instancia cu mester garantisa bienestar di mucha, a bati alarma sin cu nada a pasa.”
E situacion unico cu a presenta na Aruba for di 13 di November 2014, ora tres miembro di famia Webb-Lejuez a bay inscribi un fundacion na Camara di Comercio, a wordo presenta dor di DIARIO na informantenan experto na Aruba y den Reino Hulandes pa un motibo simpel.
Na Aruba a wordo permiti pa un fundacion priva a bay ocupa su mes cu un tipo di instituto, cu na paisnan democratico ta wordo institui dor di instancianan oficial pa coregi hobennen delincuente cu pa nan edad no por bay prison of cu kier evita di bay prison dor di keda na e institucion di coreccion cu ta den man di autoridad y ta parti di e maneho di prison.
Den Reino conoce Opvoeding Gestichten, cu ta encargo di Gobierno y ta ekipa cu personal sumamente bon specialisa riba nan tereno y cu mester atende cu muchanan cu no solamente no ta scucha nan mayornan, pero ta y por bira peliger pa comunidad.
Con Gilbert Webb a logra introduci y keda te awe cu e instituto di coreccion di hobennan no ta conoci.
Informantenan di DIARIO pafo di Aruba a keda sorprendi cu autoridad ainda no a actua riba un hecho sumamente peligroso pasobra no ta trata solamente di un school of un pasadia caminda ta papia cu e muchanan, pero cu un instituto caminda e muchanan ta wordo entrega na boluntad di un persona cu ta yama su mes Hoofd Commandant y asina ta iguala su mes cu dirigente di un ehercito, cu ta algo sumamente peligroso segun expertonan local y den Reino cu DIARIO a acerca.
Na prome luga a wordo mustra cu mester investiga y certifica con leu Gilbert Webb a wordo permiti pa uza e front y e costumbernan militar, cu na paisnan democratico, ta wordo maneha cu reglanan masha severo pasobra manera for di ayera DIARIO a cuminsa indica ta peligroso pa bida humano.
“Pakico ta permiti Gilbert Webb yama su mes Hoofd Commandant y hasta cana den trahe di Hoofd Commandant,” a wordo trece dilanti.
Informantenan a indica cu den e asunto aki, no solamente muchanan a wordo pone na peliger sin bon investigacion pasobra sigur teniendo cuenta cu e situacionnan di instabilidad politico rond Aruba, e pregunta mester surgi pakico a habri un campo cu ta semi-militar na Aruba.
E asunto ta hopi serio segun informantenan cu a mustra cu na momento cu mester tin un indicacion cu ta papia di arma directamente of indirectamente, pa Ley mester regla e asunto den Reino cu no ta tolera ningun cuerpo cu ta hunga militar na forma peligroso na Aruba.
Segun informantenan tabata tin hopi aspecto na loke a pasa cu Ministro Arthur Dowers mester a investiga for di momento cu e asuntonan di Gilbert Webb a bay hasta den Corte pasobra el a rabia cu instancianan oficial cu mester defende interes di mucha, a haci cu e centro cu tabata un horor a wordo cera.
Segun informantenan bootcamps na paisnan democratico ta wordo bon vigila pasobra na bootcamps ta existi peliger pa morto ora e personanan cu ta dirigi of traha na e camp no tin e base pa haci esaki.
A registra abuso fisico di hende, cu ta cay na rand di loke ainda no ta crimen directo na hopi bootcamps, cu mas y mas mundo ta rechasa sigur pa e hecho cu nan no ta duna resultado ya cu mas bien e muchanan y hobennan ta haya mas rabia pa e forma cu nan ta wordo humilia.
Informantenan ta indica cu como Ministro Arthur Dowers mester a actua pasobra tur instituto di coreccion na Aruba mester ta directamente bou su mando of bou mando di ehercito di Reino.
A wordo mustra riba e forma cu hobennan ta wordo traumatisa den e campamentonan aki, cu ta den man di expertonan.
Importante pa e pais ta keda cu un persona cu yama su mes Comandante General por tin aspiracion of hasta contacto cu gruponan miltar desconoci, cu ta pone no solamente hende pero pais henter na peliger.
Aruba no por papia di esaki pero loke DIARIO a base di tur publicacion cu a aparece na Aruba for di 2014 a trece dilanti si por wordo bisa ta, cu instancianan oficial, manera Huez mes a bisa, tabata tin razon di cera e bootcamp di Gilbert Webb cu hasta tabata pone mucha laba su pia mientras produccion di cuminda tabata un horor!
