ORANJESTAD (AAN) – E siguiente fin di siman, esta Diasabra 22 y Diadomingo 23 di Mei, lo tuma lugar e Vacunathon-2.
Asina Minister Presidente Evelyn Wever-Croes, a duna di conoce den conferencia di prensa, Diahuebs.
Esaki ta e di dos campaña nacional di vacunacion contra Covid-19. E vacunathon ta bay tuma lugar den e cuater localidadnan unda tabata tin esun prome: Teresita Center na San Nicolas, Centro Libertador Betico Croes na Santa Cruz, Club Don Bosco na Noord, y na Ritz Carlton Hotel. E ta di 9 or di mainta te 4 or di atardi, non stop.
“Nos ta invita tur esnan cu a wordo vacuna durante e prome Vacunathon, dia 24 y 25 di April, pa acudi na cualkier di e localidadnan aki pa nan por haya nan di dos dosis di e vacuna, pa bo ta hopi miho proteha”, Minister Presidente a expresa.
Wever-Croes a subraya cu e motibo pa cual gobierno ta keda insisti riba vacunacion, ta pasobra a wordo proba cu entre mas y mas hende vacuna e chens cu bo ta transmiti e virus na otro hende, of cu bo ta haye, ta minimo. Y si haye mes, e efectonan no ta asina serio.
E dignatario a reitera cu esey ta loke gobierno ta busca. Proteha e poblacion y specialmente esnan mas vulnerable.
