Bootcamp Mariniers Kazerne Savaneta pa hobennan di Gen297

ORANJESTAD (AAN): Algun dia pasa, un total di 23 hoben a presenta nan mes na e entrada di Mariniers Kazerne Savaneta.

E meta principal di e bootcamp ta pa entre otro siña e hobennan e structura y disciplina di militar.

   Den 24 ora cu nan a keda den e base militar, e focus tabata den balornan fundamental cu cada militar ta uza den tur tarea cu nan ta ehecuta; solidaridad, forza y dedicacion.

   Desde 2021 Asociacion Trabao di Hubentud na Aruba (ATHA) a cuminsa cu Gen297 cu ta un programa despues di scol pa hoben di scol secundario.

   Pa e actividadnan atardi den Gen297 ATHA ta traha cu diferente partners e.o. Arubaanse Muziekschool, Ateliers 89 y KNVB cu ta ofrece e programa di World Coaches. 

   Na final di e programa di Mariniers Kazerne e mayornan, Directora di ATHA Cyndi Kelly Mathilda, Regio Manager di Gen297 Franchesca Heinze, guia di grupo Reinhard Breinburg y boluntario Roberto Geerman tabata presente na e clausura hunto cu e hobennan. Durante e weekend representante di KNVB Johan van Geijn tabata na Aruba pa bishita di trabao y tambe a presencia e momento special aki.

   ATHA ta gradici Mariniers Kazerne Savaneta pa nan aporte na hubentud di Aruba y tambe na Stanley Menzo di KNVB pa a realisa esaki y ta sigui conta cu nan sosten.