ORANJESTAD (AAN): Awe ta bira e di seis dia caba, cu e parke di molina na Vader Piet no ta produciendo ningun coriente.
Esey ta pone cu henter siman, e compania WEB Aruba NV a depende completamente riba e parkenan solar cu tin rond di e isla, y di nan motornan RECIP pa genera coriente.
Pesey mes, esnan cu a pasa na Vader Piet por nota cu actualmente e molinanan di biento no ta den funcion. Esaki ta debi na un storing cu a surgi diadomingo 13 di Februari.
E compania a bay haci un investigacion, a haya e causa y awor ta den proceso pa remedia esaki. E reparacion ta exigi trabao compleho cual mester worde haci cu specialismo cu no ta disponibel riba e isla. Ademas mester importa e materialnan necesario for di afo.
Ta premira cu e molinanan di biento lo keda for di servicio entre 2 pa 3 siman; Dependiendo di disponibilidad di material lo por dura mas largo. Cu e molinanan di biento for di servicio, ta produci coriente actualmente cu energia di nos parkenan solar, pero pa mayoria parti, cu WEB su plantanan di RECIP.
No ta premira cu clientenan lo nota cambio den suministro di coriente pa falta di e energia di biento. WEB ta haciendo tur den su alcance pa importa tur material y specialistanan pa por completa e reparacion lo mas pronto posibel.
