Maneho di Daniel Leo ta bira central den crisis financiero Aruba
*Hamber scondi den crisis mundial ta un menasa pa autonomia
*Fondo di 1.6 Biyon sin un lugar central pa produccion cuminda
ORANJESTAD (AAN) — Haci husticia cu e produccion nacional di e Pueblo di Aruba, e forma cu ta uza placa di Aruba na beneficio di e Pueblo di Aruba, ta algo cu mester ta central den maneho di e pais, pasobra esaki ta e base pa e sistema estatal, pa cual e Arubiano a dicidi.
Aruba a canta su Himno y hisa su Bandera, bou liderazgo di Betico Croes, kende a nenga poder ehecutivo pa e por a coordina y dirigi e lucha como Consehero.
DIARIO a nace den e fase di culminacion di e lucha pa Status Aparte, den cual por a constata trabounan dirigi pa atende cu necesidadnan basico pa garantisa un bon funcionamento di un comunidad feliz.
Economia di Aruba na añanan 80, a conoce dinamismo enorme cu fortificacion di turismo den cual na forma historico a uni Pueblo den celebracion di Aña di Turismo pa fortifica entrada di e pais y e Arubiano.
Economia mester a sirbi Pueblo, cu den un autonomia no por tabata completamente dependiente di exterior y por a gosa di tur loke por considera necesidad basico di un existencia aceptabel.
Un pakete cu tabata sumamente importante, tabata den man di Daniel Leo, cu a drenta historia politico pa e forma cu el a atende e necesidad basico di un ser humano, cu tabata come y bebe pa garantia di un bon salud.
Agricultura (horticultura), pesca y cria tabata e prioridad grandi pa Daniel Leo, cu ora WEB a bolbe “trip”, a splica DIARIO na careda con Aruba lo tin awa limpi pa bebe y el a cumpli.
Unda e lugar prominente di produccion di cuminda den economia di Aruba a keda, ta e pregunta grandi ora tuma nota di e Fondo di 1.6 Biyon di Pueblo di Aruba pa traha brug, rotonde, hasta fietspad.
Aruba den e maneho di e fondo di 1.6 Biyon, no a haya e empuhe pa crea su propio cuminda, aunke ta recesion mundial y e resultadonan cu e tabata tin pa Aruba a habri porta pa resultadonan di eleccion 2009 na Aruba.
E 1.6 Biyon den tempo di recesion ta papia di un Hospital di 5 strea, cu no a mira strea, pero si yobida cu tabata yena e cambernan di e un hospital carga cu peliger pa bida humano.
Un hospital cu ta yena cu mas hende si e hende no ta come na un forma saludabel.
E necesidad pa un Pueblo produci su propio cuminda, a bay perdi den e plan di 1.6 Biyon di Pueblo, cu awe mester enfrenta otro crisis mundial serio.
Na 2023 mundo ta observa un crisis serio riba tereno di gasto pa cuido medico pa medio di seguronan.
Gastonan pa Cuido Medico a aumenta mientras edad di hende a sigui subi hunto cu riesgo pa enfermedad, cu ta afecta e gastonan di un aseguro.
Bon alimentacion ta wordo propaganda pa evita mas malesa y cifranan cu tin nan propio produccion di cuminda, ta sirbi como ehempel pa demostra e diferencia den sobrevivencia humano den e crisis enorme cu mundo conoce actualmente.
Prijs di cuminda a subi y ta afecta na un forma special paisnan cu no tin produccion di nan propio cuminda, loke ta subi gastonan di Cuido Medico y di Hospital.
Di recesion 2007, cu a haci necesario pa Aruba a introduci BBO loke a habri porta pa cambio di Gobierno, pa 2023, kico a pasa?
E necesidad pa Aruba produci su propio cumnda saludabel a bira mucho mas grandi.
Terenonan di Aruba ta den noticia pero no pasobra nan a wordo bon uza pa produci cuminda na prome lugar, pero pasobra segun acusacion di Ministerio Publico, nan lo a wordo uza pa corupcion.
Kico produccion di cuminda y salud di Pueblo a nifica pa Aruba entre recesion 2008 pa recesion 2023 ta bini dilanti.
Cu cambio di Gobierno na 2009, 1.6 Biyon a bay pa brug, pa fietspad, pa rotonde, pa un hospital sumamente peligroso pa bida di hende, loke ta aumenta e gastonan di e unico seguro medico na Aruba, AZV cu mester subi su prima of haya mas placa di Gobierno ora e no tin suficiente entrada pa paga un Hospital cu ta pio cu un tele novela.
Na caminda pa e Dia di Himno y Bandera 2023, nos mester recorda Daniel Leo, cu historia ta entrega un puesto di honor pa su vision pa loke ta trata necesidad di Pueblo y exigencia di un maneho democratico cu ta pone alimentacion y conservacion di bida di hende central!
