ORANJESTAD (AAN): Cas di Cultura mester di un renobacion y esaki ta loke a keda revela recientemente door di su directora Vicky Arens.
El a splica cu CdC a finalisa 2022 hayando tur e costonan envolvi pa cu esaki. Full e diseňo pa e renobacion di e localidad ta cla. Na Januari a bay Hulanda pa papia cu diferente fondo ayanan. Tin bon speransa cu e aña aki e campaña silencioso, manera cu nan ta yam'e, cu ta e campaña tras di porta pa recauda fondo ta cuminsa.
Tin programa pa 2024 tin e campaña publico pa sera ful e placa cu mester, Arens a splica.
El a agrega cu ta trata di un suma entre 14 cu 15 miyon Florin. E renobacion lo encera tur cos cual ta inclui renobacion di stage, e tower, tur e tecnicanan, e muraya acustico, entre otro. Tambe nan salanan lo wordo amplia y lo drecha tur locual ta beton cu no ta bon mas lo wordo renoba.
E lo ta un experiencia nobo ya cu e aña aki Cas di Cultura ta haciendo 65 aña y ta e momento pa e localidad wordo renoba pa e generacionnan cu ta bin.
Ta premirando cu lo mester bay cera Cas di Cultura pa mas o menos 18 luna. Pero kisas lo haci esaki den fasenan y algun parti so lo wordo cera na mesun momento, pero esey ta un detaye cu ainda no a yega na dje pa haya sa.
Na prome lugar ta pa yega na e fondo y na dado momento ta bay na e aspecto di detayenan pa asina cuminsa planea, Vicky Arens a duna di conoce.
