ORANJESTAD (AAN) – Den conferencia di prensa, Diamars atardi, a trata e tema “Stop e Violencia”.
A hiba palabra Melvin Enzo Boekhoudt, Sandra Reyes (Reyes Body Swelding Shop NV) Arturo Oduber (Gerente di Old Cunuco House Restaurant), Xiomara Hernandez Perdomo, Robert Maduro y Chaldira Vis.
Señora Xiomara Odalis Hernandez- Perdomo a habri e conferencia di prensa como lider di e proyecto “Stop Violencia pa Aruba”.
Xiomara a presenta e proyecto aki. El a señala cu despues di analiza varios punto di loke ta pasando na Aruba, a tuma e iniciativa di sali for di Hulanda y bin Aruba, pa presenta e proyecto aki.
“Nos ta un Project Team cu ta trahando na bienestar di e ser humano den tanto violencia, ayudo social y bienestar den e hogar, ayudo na crecemento den trabao, y tambe den tayernan di trabao di ‘Power Women’ y Power Men”, pa asina mañan nan lo tin un bon futuro. Tambe nos ta trata cu LGBT, nos grandinan, union na famia y guia pa e hobennan, y mayornan hoben. Y tambe nos ta hiba e parti ‘Te unda violencia por hiba bo den bida”, señora Hernandez a señala.
Xiomara a splica cu “Stop e Violencia pa Aruba”, ta parti di e organizacion “Stop Violence International” y nan ta traha cu Hulanda, Spaña, Panama, Colombia, Venezuela, Sint Maarten, y Suriname.
Na 2018, nan a presenta na Aruba caba, pero na 2019 a tuma e iniciativa pa bin bek Aruba, pero Covid a drenta y nan a bolbe Hulanda.
“Y aworaki, door di mira tanto violencia cu ta sigui pasa na Aruba, nos stap ta pa bin bek Aruba pa asina nos por haci e parti di violencia aki mas severo” Xiomara a comenta, agregando cu el a invita señora Chaldira Vis, pa forma parti di e proyecto aki, pasobra violencia tin cu stop!
“Violencia ta yega un momento cu ta basta. Nos tin violencia di mucha di diferente edad, pasobra nos ta traha cu diferente punto tambe, basa riba muchanan di 6 pa 16 aña, di 13 pa 18 aña y nos tin 18 pa 22 aña, adulto y seniornan” señora Hernandez a subraya.
El a menciona tambe cu na Aruba, norma y valornan a bay perdi. “Y aki ta na unda nos sistema, den nos organizacion, kier pone bek na Aruba, e norma y balornan pa bin bek cu educacion, y siña conoce ken ta bo yiu, cu ken bo yiu ta anda. Mi ta kere cu si nos cuminza enfrenta e problema aki na su raiz, nos lo ta hibando un Aruba den e trankilidad, unda cu nos tur por biba na paz cu otro”, Xiomara a remarca.
