Bombero yudando futuro trahadornan social pedagogico preveni candela  

ORANJESTAD (AAN): Na Colegio EPI, ta dedicando hopi atencion awor riba e forma con bo tin di prepara tur edificio y lugar pa bira un opvang pa mucha.

   Recientemente Francis Toussaint di Cuerpo di Bombero, a bishita studiantenan di e opleiding Sociaal Pedagogisch Werker, unit S&S di Colegio EPI, pa duna informacion y tips crucial tocante prevencion di candela y tambe con pa actua na momento cu tin un candela den un kinderopvang.

   Asina nan a wordo informa di entre otro: (*) Con pa crea y diseña un kinderopvang mas safe posibel pa prevencion di candela. (*) Importancia di un bon smoke detector, fire extinguisher y un pull station. Tambe con pa usa esakinan.

   Tambe a papia riba: (*) Con den emergencia por sali di un kinderopvang strategicamente mas liher posibel (protocol) sin laga 1 persona atras. (*) Con pa actua na momento cu bo/un persona wordo kima of paña coy candela.

   Na final Francis a tuma tempo pa revisa e mapa cu studiantenan a pinta di lugarnan pa cuido di mucha, y a duna tips y tools di locual ta bon y locual por wordo cambia.

   Sigur un mainta hopi educativo, yena cu informacion cu studiantenan lo bay usa den nan trabao diario como futuro trahador social pedagogico.

   Di parti Colegio EPI nan kier bisa Francis masha danki pa su bishita y informacion brinda na studiantenan.