Boluntarionan di Colegio San Antonio a duna bek na comunidad

Mas di 30 alumno di 4e klas di Colegio San Antonio MAVO na Santa Cruz, a haci trabao boluntario riba Diasabra mainta.

   E alumnonan aki a mobiliza pa Brazil, unda nan a bay yuda laba auto na e Christmas Carwash di SPO Brazil.  Di e forma ey yuda esnan di e scol ey pa recauda fondo.

   Directiva di Colegio San Antonio a indica cu nan ta gradici tur e alumnonan cu a lanta trempan y a duna e mihor di nan banda riba e dia aki.  E ta un indicacion bunita cu e hobennan aki ta lantando y creciendo cu e chispa di ‘responsabilidad’ y e calor humano pa yuda nan prohimo.  Esaki ta algo hopi balioso awendia pa asina comunidad tin toch ainda hopi confiansa den e futuro generacion di lo bay brinda bon servicio riba e isla.  Directiva a bisa cu nan ta super orguyoso di e grupo!

   Hubentud den Movecion ta corda cu ya caba luna pasa, boluntarionan di e scol aki a bay yuda Parokia Cristo Rey cu un fundraising bingo.  Fenomenal pa mira con scol ta yuda otronan pa un bon causa.

   Masha pabien na e alumnonan aki, cu sigur sa di e importancia pa keda duna yudansa y servicio pa henter comunidad bay dilanti.