Bogotá ta uni den oracion pa salud di Miguel Uribe cu altar special dilanti di Clinica Fundación Santa Fe

DIARIO cu potretnan exclusivo

ORANJESTAD (AAN): Den un gesto di amor y speranza, e entrada principal di Clinica Fundación Santa Fe na Bogotá a prepara un altar special dedica na oracion pa salud di pre-candidato presidencial Miguel Uribe.

            Riba potretnan exclusivo, por mira claramente loke ta pasando actualmente na Colombia, y prensa tabata presente pa captura e momento emocional y significante aki como tambe pa sigui di cerca e desaroyo relaciona cu e salud di Uribe.

            E altar, cu ta decora cu vela, flor y mensahe di fe, ta coloca dilanti mes di entrada di e clinica. Esaki ta un señal cla cu hopi hende ta uni den oracion y speransa pa un recuperacion rapido y completo di Uribe.

            Segun fuente confiabel, Miguel Uribe ta actualmente interna bao cuido di un di e neurociruhano mas reconoci den region – Dr. Hakim, e mes specialista cu tabata opera e presidente di Colombia algun aña pasa.

            Rond di e area di e hospital, tur caminda bo por lesa e mensahe inspirador: “Te esperamos Miguel Uribe”, un slogan cu ta resona hopi profundo den curazon di su seguidornan y tur ciudadano cu ta sigui su carera y deseo pa un futuro miho pa Colombia.

            E ambiente ta carga cu silencio, pero tambe cu fe. Hende ta yega pa pone vela, manda oracion, y expresa nan sosten. Esaki ta demostra no solamente e peso politico di Uribe, pero tambe e cariño y speransa cu hopi colombiano tin pa su bienestar.

            Senador Colombiano Miguel Uribe, kende a keda hospitaliza desde cu el a wordo tira na cabes na inicio di e luna aki durante un evento di campaña, a wordo traslada pa un operacion di emergencia pa un sangramento den su cerebro, asina Hospital Fundación Santa Fe a bisa dialuna.
            Uribe, di 39 aña, un candidato potencial pa presidencia di banda drechi di oposicion, a wordo tira na Bogotá dia 7 di juni durante un 'mitin'.
            "E pashent Miguel Uribe Turbay mester a wordo translada pa operacion algun rato pasa pa un procedimento neurologico urgente, pa motibo di evidencia clinico y imagen cu ta mustra un sangramento agudo den su cerebro," e hospital a bisa den un comunicado di prensa.

            Riba fotonan exclusivo pa Matutino DIARIO ARUBA a captura e momento di respet y detaye, mustrando e impacto humano di un situacion hopi serio, pero rondona di fe y unidad.