Bo por perde e permiso si bo facilita estadia ilegal di famianan na Aruba

Minister Dowers ta adverti migrantenan cu permiso di DIMAS

ORANJESTAD (AAN): Durante conferencia di prensa, Minister di Husticia, mr. drs. Arthur Dowers, a comparti un situacion preocupante relaciona cu personanan cu ta biba legalmente na Aruba y cu ta facilita entrada di miembronan di nan famia cu e intencion pa e personanan aki keda na Aruba mas largo cu e periodo di estadia ta permiti.

   Minister Dowers a splica cu DIMAS ta otorga permiso bao di condicionnan specifico, cual cada persona cu tin esaki, tin cu tene su mes na dje. E hecho cu un persona tin un permiso valido pa ta na Aruba no ta nifica cu e persona automaticamente tin derecho di trece miembronan di su famia pa establece nan mes na Aruba sin cumpli cu e proceduranan legal di admision.

   Segun Minister Dowers, ta importante haci un distincion entre un bishita temporal di un familiar y un situacion den cual un persona ta facilita entrada di un miembro di famia, sabiendo di antemano cu e intencion ta pa e famia keda na Aruba sin e permiso di estadia necesario.

   E minister a adverti cu esnan cu permiso di estadia/trabao cu conscientemente ta facilita of contribui na un estadia ilegal di un familiar, ta core riesgo cu DIMAS por revoca e permiso, mirando cu e comportacion aki ta un violacion di e condicionnan bao di cual a duna e permiso.

   Minister Dowers a enfatisa cu cada persona cu desea establece su residencia na Aruba mester sigui e procedura regular di admision y cumpli cu e rekisitonan legal aplicabel. E existencia di un relacion familiar cu un residente legal no ta kita e obligacion aki.

   E mandatario a subraya cu e responsabilidad pa cumpli cu e leynan di admision no ta limita solamente na e persona cu ta drenta Aruba, pero ta inclui tambe esnan cu ta facilita of deliberadamente contribui na un situacion di estadia ilegal. Ademas tin cu tene cuenta cu mester haci peticion pa permiso den exterior y te ora ricibi e VTA, por biaha pa Aruba pa sigui e proceso pa permiso.

   Minister Dowers ta haci un yamada na tur persona cu permiso di DIMAS pa actua cu responsabilidad y informa nan mes debidamente tocante e condicionnan y proceduranan aplicabel prome cu invita of facilita entrada di un familiar cu intencion di establece residencia na Aruba.