15 October FAVI:
ORANJESTAD (AAN): 15 di october ta dia internacional di e garoti blanco strepi cora. Pa recorda e dia aki, FAVI kier informa e comunidad e nificacion di e garoti cu ta wordo uza dor di un persona cu tin limitacion di bista. Nan lema e aña aki ta 'Bo mira nos cu nos garoti, sea conciente pa asina nos por ta mas independiente. Bo mir’e, para p’e!
Internacional tin diferente garoti. E prome ta un garoti blanco cortico. Esaki no ta wordo uza na Aruba. Pero si bo mira un persona cu un garoti blanco cortico den su man esey kiermen cu e persona tin un limitacion visual; e ta wak hopi wazig.
E di dos ta un garoti di mobilidad. E ta e garoti cu nos ta custumbra di mira mas na Aruba. E ta yuda un persona cu tin problema di bista sea parcial of total ceguera pa mobilisa. E punta di e garoti por ta rondo di diferente grandura. E tipo di punta aki ta mas gusta dor cu e persona no mester hisa e garoti for di vloer. E punta rondo ta yud'e identifica e ruta mihor. Sea e lo ta plaat of e lo ta grof.
E garoti di movilidad cu punta ta ser uza tambe pa mobilisa. E persona ta move e garoti links pa rechts pero e ta lant'e for di vloer. E ta haci un sonido di tik riba vloer.
E garoti ta blanco, y pa esnan cu ta uza e garoti den trafico, e garoti tin un strepi cora na punta. Di e manera aki e trafico en general ta reconoc'e.
Segun regla di trafico di Aruba, persona cu tin un discapacidad visual cu tin su garoti tin preferencia pa crusa pero e tin cu haci uzo di e manera corecto:
Para y hisa e garoti den halto pa hala atencion di e automobilista.
Warda e auto stop y duna e señal cu un pito suave of stem 'crusa numa'.
Un yamada ta bay na tur automobilista pa baha velocidad. Si bo ta core den un area unda hende ta cana, corda cu nan tambe ta forma parti di trafico. Baha speed y respeta e reglanan di trafico.
Pa cera e accion di concientisacion FAVI lo ta organisando un anochi informativo pa famia riba diamars 15 di october for di 6:30 pm te cu 8:30 pm. Famia y tur esnan cu ta desea di haya mas informacion di kon nan por yuda nan famia cu tin un limitacion por acudi. E lo ta completamente gratis. Pa regista por tuma contacto na 582-5222 0f manda un mensahe na 560-9225.
