Bo Amigo CMB cu “Beach Clean Up” na nos costa nort

ORANJESTAD (AAN): Caribbean Mercantile Bank N.V. (CMB) a organiza siman pasa hunto den tres departamento su prome den serie di evento di “Beach Clean Up”.

   Nos tur ta bon informa, cu e problema mundial di desperdicio riba lama ta algo serio y cu mester purba di preveni of controla esaki unda cu por. Aruba su costanan di noord pa hopi aña ta testigo di esaki mirando desperdicio cu ta alcansa na keda pega riba su playanan cu no ta procedente di Aruba mes, sino di barconan cu ta benta esaki riba lama y/of paisnan den region cu ta permiti awa di riunan drenta oceano sin worde procesa.

   Aruba como pais rico den beyeza natural tin cu proteha esaki pa su bishitante por oberve cu gusto. Un playa na costa nort yena cu sushi no solamente no ta un bunita bista, pero tambe ta trece peliger pa Aruba su flora y fauna terestre y maritimo.

   Mirando cu tarea di mantene nos costanan ta un trabao periodicamente continuo CMB y su staff a dicidi di pone man na obra, planea y ehecuta nan prome limpieza di playanan. Mas o menos 30 empleado en total a sa di reuni trempan mainta y cana bay na e playa asigna bou guia di Park Rangers di Parke Nacional Arikok. Aki nan a ser informa di e trabao, con pa recohe, y kico mester tene na cuenta pa protehe bo mes tambe ora di haci e limpieza.

   Un trabao den ekipo ehemplar caminda coordinacion di forza y detaye a haci cu parti di Aruba su patrimonio a keda limpi y natural.

   Pabien na e team completo cu a organiza e evento aki, y tambe danki na rangers di Parke Nacional Arikok pa nan guia y apoyo. Bo Amigo.