FADA ta pone enfasis riba e risiconan di humamento
ORANJESTAD (AAN): Diamars mainta, Fundacion Anti Droga Aruba (FADA) a yama un rueda di prensa unda riba Dia Mundial di bisa No na Tabaco, nan a trece informacion hopi importante pa comunidad.
Rulienne Arends, Trahador Preventivo di FADA a bisa cu riba 31 di Mei, cu ta dia mundial di bisa no na tabaco, FADA kier pone hopi enfasis riba algun topico di suma importancia.
E tema di e aña aki ta pa proteha tur cos cu tin rond, manera e naturalesa, e ser humano. Esey ta e enfoke di Organisacion Mundial di Salud pa e dia aki.
Pa hopi aña, FADA ta bin ta concientisa riba e topico aki y kico tur ta e peligernan ora c'un persona ta bay uza un producto di tabaco, Arends a señala.
E muchanan, por ehempel, tin hopi pregunta pa cu e topico aki mirando cu rond di nan, un mayor of un otro persona rond di nan ta huma un cigaria. Muchanan ta puntra pakico nan ta huma, si esey no ta haci nan daño.
Pesey kier a para keto un rato pa informa comunidad riba tur e peligernan no solamente pa esnan cu ta huma, pero pa esunnan rond. Tur aña FADA ta bishita hopi scol unda tin un topico di humamento.
Rulienne Arends a sigui bisa cu nan tin un personahe cu yama Sam cu ta uza diferente ehempel riba entre otro, kico ta pasa ora cu ta huma un sigaria y con e pulmon ta bira cu tempo.
Banda di esaki tin un kimico cu ta hopi adictivo cual ta e nicotina. Esaki ta pone c'un persona ta bira adicto na sigaria. Pesey ta hopi importante pa papia cu e muchanan y hobennan riba e peligernan ora di huma sigaria.
Tin e 'second hand smoking', cu ta esnan cu no ta huma, pero cu rond di nan tin un persona cu ta haci uzo di sigaria of ora di sali tin hende cu ta huma rond di nan.
Segun e trahador di FADA, algo cu nan kier pone enfasis riba dje ta 'black stone' cu ta un producto cu parce un mini cigar y cu por hay'e pa cumpra facilmente. E 'black stone' aki cada un tin un sabor diferente, pero esakinan tambe ta contene nicotina.
Ta hopi facil pa e hobennan yega y cumpra esaki y por ta tin mayornan cu no ta na altura cu tin e tipo di productonan aki tambe cu por wordo cumpra.
No por laga afo e cigar cu ta hopi conoci cerca e hendenan grandi. Sinembargo, e cigar ta wordo treci dilanti pa e hobennan sa di su riesgonan.
"Ta hopi importante pa e dia di awe pa nos para keto y corda tur hende kico ta e dañonan cu bo ta causando sea na bo salud mes si bo ta huma, pero tambe na e salud di un otro persona", Arends a remarca.
