Pronosticonan ta papia di 19 tormenta y 9 horcan
* Den caso necesario Meteo Aruba lo emiti boletinnan di advertencia
ORANJESTAD (AAN): Ta conoci cu riba 1 di Juni te na fin di November e temporada di horcan den lama atlantico ta activo.
Segun pronosticonan di expertonan, e temporada aki ta bay ta basta activo esaki danki na e fenomeno di La Niña cu ta causa cu e temperaturanan den lama Atlantico ta ariba e promedio.
E Oficina di Administracion Oceanico y Atmosferico di Merca (NOAA), a duna di conoce cu e temporada lo ta ariba e promedio, y lo trece entre 14 te cu 21 tormenta tropical cu nomber. Di nan, ta anticipa cu entre 6 y 10 lo haya forsa y bira horcan y di 3 pa 6 lo ta mayor, locual kiermen di categoria 3 of superior.
Un temporada di horcan averahe tin 14 tormenta cu nomber, 7 horcan y 3 mayor.
Ta bon pa menciona cu e temporada 2020 y 2021 a agota e lista di nombernan di horcannan y a bati recordnan.
No por bisa cu certeza si e aña aki lo sosode mescos. Pero, na cuminsamento di luna di April, Universidad Estatal di Colorado a publica su cifranan, cu a coincidi exactamente cu e prosnosticonan di NOAA.
E pronostico di e universidad a señala 19 tormenta cu nomber y nuebe horcan, di cual cuater lo ta mayor.
Despues di añanan consecutivo di uza tur e nombernan di horcannan y haci uzo di e alfabeto griego, Organizacion Meteorologico Mundial a dicidi pa stop cu e uzo di e alfabeto griego y a haci un lista posterior di nombernan cu lo por wordo uza den caso cu e nombernan ta caba un biaha mas.
El lista di nombernan stipula pa e tormentanan tropical y horcannan di e temporada 2022 pa lama Atlantico ta e siguiente: Alex, Bonnie, Colin, Danielle, Earl, Fiona, Gaston, Hermine, Ian, Julia, Karl, Lisa, Martin, Nicole, Owen, Paula, Richard, Shary, Tobias, Virginie y Walter.
Departamento Meteorologico di Aruba a duna di conoce cu manera ta e custumber nan lo vigila e desaroyonan riba Atlantico y den caso necesario lo emiti boletinnan di advertencia pa pueblo di Aruba.
Imagen: NASA
