Bishita di Trabou di Minister di Defensa na Region Caribe

ORANJESTAD (AAN):  Minister di Defensa Ruben Brekelmans lo bishita e parti Karibense di Reino Hulandes for di dialuna 5 di januari te cu diahuebs 8 di januari.

Esaki ta un bishita di trabou regular na e islanan/paisnan  den Caribe Aruba, Sint Maarten, Curaçao, y Bonaire. E Minister lo bishita e unidadnan di Defensa desplega y lo ricibi un splicacion di nan tareanan den e region. 

Dialuna dia 5 di januari Minister lo cuminsa cu e bishita di trabou na Kazerne di Marina na Savaneta na Aruba. Diamars lo sigui un bishita na e Destacamento di Cuerpo di Marina na Sint Maarten, y e Base Naval Parera na Curaçao ta programa pa diaranson. Diahuebs 8 di januari, despues di un bishita na e barco di stacion HNLMS Groningen, Minister lo conclui e bishita di trabou na Marechosé Real na Bonaire. 

Banda di bishita diferente unidad di Defensa, Minister Brekelmans lo papia cu e Gobernadornan, Prome Ministernan, y e Gezaghebernan di e islanan/paisnan den Caribe. Esaki ta encera atencion pa e situacion actual den region Caribe, prioridadnan conhunto y cooperacion mutuo.